Сунтаарга көҥүлэ суох уоран арыгы атыылааччылары эппиэтинэскэ тартылар.
Сунтаар нэһилиэгэр полиция көрдүүр-ирдиир сулууспатын үлэһиттэрэ көҥүлэ суох арыгы уоран атыылааччы киһини туттулар. Биллэринэн, 56 саастаах киһи сарсыарда эрдэ аадырыска тиийэн массыынатыттан билбэт дьонугар итирдэр утахтары атыылаабыт. Арыгы атыылыыр туох да көҥүлэ суох, ону ааһан икки бүк үрдүк сыанаҕа атыылаабыт киһиэхэ полиция үлэһиттэрэ РФ административнай быраабы кэһии кодексатын 14.17.1 ыст. 1 ч. «Сокуону кэһэн туран физическэй сирэйдэргэ арыгы атыылаабытын иһин» боротокуол толорон, ону тэҥэ арыгы атыылаабытын туһунан дакаастабылы хомуйан, туоһу дьону ыйыталаһан, мировой суут көрүүтүгэр ыыттылар. Бу күннэргэ суут уурааҕынан арыгы атыылаабыт киһи 30000 солк. ыстарааптанна.
Манныка майгынныыр түгэн Сиэйэ нэһилиэгэр буолбут. Ол курдук, 46 саастаах Сиэйэ нэһилиэгин олохтооҕо дьиэтигэр олорон эрэ билэр киһитигэр эмиэ бас быстар сыанаҕа арыгы атыылаабыт. Бу туһунан полиция участковай уполномоченнайа билэн, административнай кэһии дакаастабылын хомуйан мировой суут көрүүтүгэр киллэрбит. Түмүккэ буруйданааччы РФ административнай быраабы кэһии кодексатын 14.17.1 ыст. 1 ч. эппиэтинэскэ тардылынна, эмиэ 30000 солк. ыстараап төлүүргэ болдьохтонно.
Мира АФАНАСЬЕВА