Бүгүн социальнай харалта үлэһиттэрин идэлээх күннэрэ. Бу күн улууска үөрүүлээх сонун кэллэ. Ол курдук, С.Г.Кривошапкин аатынан дьиэ кэргэҥҥэ иитиигэ көмөнү оҥорор киин Сунтаардааҕы салаатын педагог- психолога Анна Тимофеева өрөспүүбүлүкэҕэ бастыҥ социальнай харалта үлэһиттэрин ахсааныгар киирэн Саха сирин социальнай харалтатын Арассыыйа таһымыгар көмүскүөҕэ. Кини “Элбэх оҕолоох дьиэ кэргэҥҥэ бастыҥ көмөнү оҥоруу” анал аат кыайыылааҕа буолла. Анна Тимофеева 20-тэн тахса сыл социальнай эйгэҕэ үлэлиир. Баай уопуттаах үлэһит кыайыытын туһунан санаатын маннык үллэстэр: “Бу кыайыым аҥардас бэйэм эрэ ситиһиим буолбатах. Бу элбэх киһи сыралаах үлэтэ. Дьиэ кэргэҥҥэ иитиигэ көмөлөһөр кииммит сөптөөхтүк уонна былааннаахтык үлэлиирин туоһута буолар. Үлэбитигэр сүрүн болҕомтону кыһалҕаҕа кыһарыйтарбыт, түбэспит ыалга психологическай көмөнү тэҥэ, бары өттүнэн дьиэ кэргэни санаатын бөҕөргөтүүгэ, өйөбүлгэ уурабыт. Ыытар үлэбитин өрөспүүбүлүкэҕэ ситиһиилээхтик билиһиннэрдибит, билигин Арассыыйа таһымыгар көрдөрүөхпүт”.
Бастыҥ социальнай харалта үлэһиттэрин үлэ миниистирэ Елена Волкова эҕэрдэлээтэ: “Социальнай харалтаҕа идэлэригэр бэриниилээх эрэ үлэһиттэр үлэлииллэр. Кинилэргэ киһи үтүө эрэ хаачыстыбата баар буолан бу эйгэҕэ дуоһуйууну ылан үлэлииллэр”. Кыайыылаахтарга СӨ Бырабыыталыстыбатын бэрэссэдээтэлин солбуйааччыта Георгий Степанов наҕараадалары туттартаата.
“Түгэнинэн туһанан, биир идэлээхтэрбин идэлээх күммүтүнэн итиитик-истиҥник эҕэрдэлиибин! Саамай сүрүнэ доруобуйаны баҕарабын. Оччоҕо үлэбит үтүө түмүктэрдээх буоларыгар саарбахтаабаппын. Күрэскэ көҕүлээбит салайааччыларбар Людмила Леонтьеваҕа уонна Марианна Босиковаҕа, бииргэ үлэлиир дьоммор махталбын тириэрдэбин”,- диэн Анна Тимофеева “Сунтаар сонуннарын” ааҕааччыларын кытта үөрүүтүн үллэһиннэ.
Мира АФАНАСЬЕВА