Бүгүн, балаҕан ыйын 27 күнүгэр, С.А. Зверев — Кыыл Уолун аатынан норуот айымньытын киинигэр улуус урбаанньыттара уонна тэрилтэ салайааччылара Саха сирин урбаанньыттарын күннэригэр анаан, төгүрүк остуол тула кэпсэтии ыыттылар.
Улууска урбаан сайдыытын тула кэпсэтиини, улуус дьаһалтата уонна “Мин биисинэһим” киин Сунтаардааҕы салаата тэрийдилэр. Бу күн, өрөспүүбүлүкэбитигэр Судаарыстыбаннас күнэ буолан, тэрээһин кыттыылаахтара Саха сирин гимнын сүһүөхтэригэр туран, бэлиэ күнү уруйдаатылар.
Быйыл Саха сиригэр 23-с төгүлүн Урбаанньыт күнэ бэлиэтэнэр. Бу идэлээх бырааһынньык дьоҕус уонна орто урбаан өрөспүүбүлүкэ социальнай-экэнэмиичэскэй сайдыытыгар сүҥкэн оруоллааҕын көрдөрөр. Оттон биһиги улууспутугар күн бүгүн бу эйгэҕэ 600 кэриҥэ урбаанньыт таһаарыылаахтык үлэлии-хамсыы олорор. Кинилэри улууспут Аҕа баһылыга Анатолий Григорьев эҕэрдэлээтэ уонна урбаан сайдыыта 1990-с сыллартан саҕалаан, саҥа салааларга хорсуннук киирэн, балысханнык сайдан, атаҕар турбута диэн бэлиэтээн эттэ. Ол курдук улуус, өрөспүүбүлүкэ, эрэгийиэн, таһымыгар биллэр урбаанньыттар баалларынан киэн тутта ааттаата. Билиҥҥи уустук кэмҥэ Сунтаар улууһа сайдарыгар, социальнай-экэнэмиичэскэй сайдыыта бөҕөргүүрүгэр, олохтоохтор үлэлээх буолалларыгар уонна дьон-сэргэ кыһалҕатыгар күүс-көмө буолалларыгар махтал тылы анаата. Итини этэн туран, урбаан эйгэтигэр улэлии-хамсыы сылдьар дьоммутугар махтал суруктары туттарда.
Салҕыы тэрээһиҥҥэ кэлбит урбаанньыттарга анаан улуус тэрилтэлэрин спикердара үлэ торумнарын билиһиннэрдилэр уонна сүрүн суолталаах боппуруостарга сүбэ-ама, хоруй биэрдилэр.
Елизавета ТИТОВА.