Бу ааһан эрэр сылга улууспутугар туох-ханнык үлэ-хамнас барбытын улуус салалтата, туһааннаах тэрилтэлэр отчуоттара быйыл саҥалыы ньыманан ыытыллыаҕа. Ол курдук, ахсынньы 23 күнүгэр улууспут баһылыга Анатолий Григорьев бары нэһилиэктэри хабан ВКС нөҥүө сыллааҕы үлэни билиһиннэриэҕэ, ситиһиилэри кэпсиэҕэ, баар кыһалҕалары,ыарахаттары быһаарарга улуус олохтоохторун кытары сүбэлэһиэҕэ.
Бу күн күнүс 3 чаастан Сунтаар нэһилиэгин олохтоохторо С.А.Зверев-Кыыл Уолун аатынан норуот айымньытын киинигэр, оттон нэһилиэктэр олохтоох кулууптарыгар мустан аныгы кэм технологиятынан экран нөҥүө отчуоту истиэхтэрэ, дьүүллэһиэхтэрэ.
Быйыл тоҕо маннык дьаһаныы буолла диэн ыйытар үгүс буолуо. Онно маннык быһаараллар, билигин тумуу, ковид ыарыылара турбут кэмнэригэр ыарыыттан харыстаныы дьаһала, ону сэргэ саҥа технологияны туһаныы буолар. Ону таһынан быйыл СӨ Бырабыыталыстыбатын отчуотун эмиэ ВКС нөҥүө ыытарга былааннаабыт. Онон онно бэлэмнэнии курдук эмиэ ыытыллар.
Улуус олохтоохторо, быйылгы үлэ-хамнас туһунан отчуот «Сунтаар сонуннара» хаһыат ахсынньы 12 күнүнээҕи нүөмэригэр уонна сунтаарсонуннара.рф саайпытыгар бэчээттэммиттэрэ. Оттон бу буолаары турар отчуокка олохтоохтор бэйэҕит ыйытыыгытын, туруорсуугутун эрдэттэн олохтоох дьаһалталар исписэлиистэригэр суругунан биэриэххитин сөп, ону таһынан отчуот буола турар кэмигэр ыйытыылары хомуйар эппиэттээх дьон үлэлиэхтэрэ.
Яина ВЛАСЬЕВА