Толооҥҥо Сунтаар улууһун дьаһалтатын 2023 сыллааҕы үлэтин отчуотун баһылыгы социальнай боппуруостарга уонна имиджевэй политикаҕа солбуйааччы Гаврил Еремеев туруорда. Кинини кытары улуус сүрүн тэрилтэлэрин үлэһиттэрэ кэлэн ааспыт үлэлэрин туһунан билиһиннэрдэилэр.
Улуус дьаһалтатын ааспыт сыллааҕы үлэтин отчуотун истэн баран олохтоохтор боппуруостарын биэрдилэр. Холобур, нэһилиэк олохтооҕо Елена Павлова «Толооҥҥо хаһан маршрутнай автобус сылдьар буоларый?» диэн ыйыталаста. Гаврил Михайлович этэринэн, итинник боппуруоһу нэһилиэк барыта ыйыталаһар эбит, хомойуох иһин, ааспыт сылга сатамматах, тиэхиньикэ тиийбэтинэн сибээстээн. Саҥа тиэхиньикэлэри ыларга сайаапка бэриллибитэ диэтэ. Онон автобустар кэллэхтэринэ бу боппуруоска үлэлэһиэхпит диэтэ.
Хоро нэһилиэгин олохтооҕо, оскуола дириэктэрэ Мария Софронова нэһилиэккэ уу баһар массыына суоҕунан тэрилтэбитигэр тэхиниичэскэй ууга кыһалҕалаахпыт диэн былырыын этиммиппит быһаарылынна диэн олоробут. Ол курдук, ОДьХК, дьокутааппыт көмөлөрүнэн уонна бэйэбит оскуола күүһүнэн турбалары атыылаһан тэхиньиичэскэй уубутун ОДьКХ емкоһыттан теплотрасса устун уу ыла олоробут. Каадыр боппуруоһун эмиэ таарыйда.
Кулууп дириэктэрэ Вера Иванова улуус үлэтин-хамнаһын ааҕан-көрөн истэ-билэ олорорун эттэ. Кини кулууп тэлгэһэтин олбуордааһыны өссө төгүл туруоруста. «Сметабын оҥордум, тутуу управлениетыгар киллэрэн салгыы үлэлэһиэхпит» диэн эттэ.
Мантан да үгүс этиилэр, ыйытыылар киирдилэр.Онно сөптөөх хоруйу ыллылар.
Тэҥкэ. Сунтаар улууһун дьаһалтатын ааспыт сыллааҕы отчуотун истэн-көрөн баран, Тэҥкэ олохтоохторо интэриэһиргиир боппуруостарын ыйыттылар.
Олохтоохтор биир сытыы кыһалҕалара — суол туруга. Сайын ардаатаҕына суол алдьанан кыра массыыналар сылдьаллара эрэйдээх буолар эбит. Ону кытта оскуолалара аварийнай туруктаах, тыа хаһаайыстыбатын исписэлииһэ тиийбэтин туһунан боппуруостары көтөхтүлэр.
Бордоҥ нэһилиэгин олохтоохторо сүрүн кыһалҕаларын биллэрдилэр. Үгүс өттө тутуу хайысхатыгар сыһыаннаах, ол курдук хаһан саҥа кулууп, балыыһа, улууска кырдьаҕастар дьиэлэрин туттууларын интэриэһиргээтилэр. Ону сэргэ суол боппуруоһа эмиэ турда.
Олохтоохтор ыйытыыларыгар хоруй ылыллар. Туруорсууларын боротокуолга киллэртэрэн, ол туолуутугар салгыы үлэ барыаҕар эрэнэ, күүтэ хаалбыттарын эттилэр.
Улуус дьаһалтатын үлэтин биһирииллэрин илии уунан бигэргэттилэр.
Дмитрий ЫМЫЧАНОВ
Ааптар видеоҕа устуута, хаартыскаҕа түһэриитэ