Бу кэмҥэ дьиэ кэргэнинэн, доҕоттордуун түмсэн бырааһынньык өрөбүллэрин бииргэ атаарар үгэстээхпит. Онуоха Сунтаарбыт улууһугар ханна сылдьыахха сөбүй?
Screenshot
Сылын аайы Хадан нэһилиэгин олохтооҕо Иннокентий Иванов хаарынан ураты оҥоһугу кыһар идэлээх. Кини уран оҥоһуктара куруук сахалыы халандаар бэлиэтигэр сөп түбэһэр буолар. Былырыыҥҥы хаар оҥоһугун Иэйэхсит сылыгар анаабыт эбит буоллаҕына, быйыл Үрүҥ Айыы Тойон сылыгар анаан оҥордо. Иннокентий Иванов оҥорбут үлэтэ чахчы да, дьон хараҕын тардар, олус кэрэ көстүүлээх буолар. Ол да иһин ыраахтан-чугастан үгүс дьон тоҕуоруһа мустан, кэрэхсии көрөн, хаартыскаҕа хатанан барар. “Номнуо бүгүн, тохсунньу 1 күнүгэр, сарсыардаттан дьон-сэргэ быыстала суох кэлэн эрэллэр», – диэн Иннокентий этэр.
Өссө биир бэлиэ сиригэ – Элгээйи нэһилиэгэр баар Б.Н. Андреев аатынан Айылҕа түмэлин баран көрүөххүтүн сөп. Бу эмиэ бэйэтэ олус дьикти, баай экспонаттардаах түмэл буолар. Тохсунньу 1 күнүттэн 11 күнүгэр сарсыарда 9:00 ч. киэһэ 17:00 ч. дылы аана куруук аһаҕас, ыалдьыттары көрсөргө бэлэм. Эбиэтин бириэмэтэ 12:30ч.-14:00ч. дылы.
Бу курдук, кыһыҥҥы уһун өрөбүллэри дьиэ кэргэнинэн, доҕоттордуун туһалаахтык атаарыҥ, сынньалаҥҥытын сэргэхситиҥ.
«Сунтаар сонуннара» эрэдээксийэ