Саха сиригэр байыаннай үөрэхтээһин 100 сылыгар аналлаах Дьокуускайдааҕы национальнай байыаннай оскуола Кыһыл Знамятын куоппуйатын өрөспүүбүлүкэтээҕи эстафетатын тэрээһинэ бүгүн, атырдьах ыйын 26 күнүгэр Сунтаар улууһун кыраныыссатыгар үрдүк таһымҥа ыытылынна.
Ньурба улууһун дэлэгээссийэтин Сиэйэ орто оскуолатын кэлэктиибэ саха үтүө үгэһинэн алгыстаах алаадьынан, кымыһынан истиҥник көрүстэ. Тэрээһин Дьокуускайдааҕы национальнай байыаннай оскуолаҕа үөрэммит биир дойдулаахтарбыт үтүө ааттарын үйэтитии, сөргүтүү, Ийэ дойдуларын көмүскээбит буойуттарга сүгүрүйүү бэлиэтэ уонна үөрэнээччилэр төрөөбүт дойдуларын историятын үөрэтэллэригэр тирэх буолар. Бу патриотическай иитиигэ улахан суолталаах тэрээһини СӨ үөрэххэ уонна билимҥэ министиэристибэтэ көҕүлээн ыытар. Кыһыл Знамя өрөспүүбүлүкэтээҕи эстафетата олунньу ыйтан саҕалаан бары улуустарынан сылдьан, ахсынньы ыйга айанын түмүктүөхтээх.
1926 с. олунньу 23 күнүгэр байыаннай оскуолаҕа үөрэх саҕаламмыта. Ити сыл ыам ыйын 25 күнүгэр байыаннай оскуола бастакы курсаннара андаҕар биэрбиттэрэ. Дьокуускайдааҕы байыаннай оскуола 1926 сылтан 1941 сылга диэри үгүс алын сүһүөх командирдарын бэлэмнээбитэ.
Тэрээһиҥҥэ Сунтаар улууһун баһылыгын социальнай боппуруостарга уонна имиджевай бэлиитикэҕэ солбуйааччы Мирослав Иванов, Сунтаар улууһун бэтэрээннэрин Сэбиэтин бэрэссэдээтэлэ Афанасий Васильев, Сунтаар улууһун үөрэҕин салалтатын начальнига Борис Васильев бэйэлэрин эҕэрдэ тылларын эттилэр. Ньурба улууһун баһылыгын социальнай боппуруостарга солбуйааччытын э.т. Валерия Алексеева үөрүүлээх быһыыга-майгыга Дьокуускайдааҕы национальнай байыаннай оскуола Кыһыл Знамятын Сунтаар улууһун баһылыгын социальнай боппуруостарга уонна имиджевай политикаҕа солбуйааччытыгар Мирослав Ивановка туттарда. Тэрээһиҥҥэ Дьокуускайдааҕы национальнай байыаннай оскуолаҕа үөрэммит выпускниктар хаан-уруу аймахтара кытыннылар: Күүкэйтэн төрүттээх, 1930 с. выпускнига Максимов Софрон Степанович аймаҕа, Күүкэй орто оскуолатын байыаннай үөрэхтээһиҥҥэ учуутала Аркадий Евсеев, Хадантан төрүттээх, 1941 с. выпускнига Кугасов Григорий Степанович аймаҕа, Сунтаар улууһун үөрэҕин салалтатын иитии уонна эбии үөрэхтээһин отделын сэбиэдиссэйэ Александра Павлова. Бу патриотическай иитиигэ хайысхалаах тэрээһиҥҥэ Сиэйэ, Түбэй-Дьаархан, Күүкэй, Кутана орто оскуолаларын дириэктэрдэрэ, педагогтара, эдэр армеецтара кыттыыны ыллылар.
Аҕа дойду Улуу сэриитин кэмигэр байыаннай оскуоланы бүтэрбит биир дойдулаахтарбыт саамай уустук кэмҥэ Ийэ дойдуларын көмүскээһиҥҥэ хорсуннук сэриилэспиттэрэ. Байыаннай идэлээхтэр дойдуга олус наадалаахтар этэ. Историяттан биллэрин курдук, ХХ үйэ 30-с сылларыгар элбэх генераллар, командирдар репрессияҕа түбэспиттэрэ. Онон дойдуга үөрэхтээх байыаннайдар ахсааннара лаппа аҕыйаан каадыр боппуруоһа сытыытык турбута. Байыаннай оскуола выпускниктара сэрии толоонугар Ийэ дойдуларын туһугар сэриилэспиттэрэ. Уоттаах сэрииттэн тыыннаах дойдуларыгар эргиллибит, кыргыһыы толоонугар охтубут хас биирдии буойун хорсун быһыыта үйэлэргэ сүппэт.
Салгыы Дьокуускайдааҕы национальнай байыаннай оскуола Кыһыл Знамятын куоппуйатын балаҕан ыйыгар Сунтаар улууһун дэлэгээссийэтэ Мииринэй улууһугар туттарыаҕа.
«Сунтаар сонуннара» эрэдээксийэтэ