Новосибирскайга олорор биир дойдулаахтарбыт куоракка ыытыллар араас култуура тэрээһиннэригэр өрүү инники күөҥҥэ сылдьаллар. Сомоҕолоһуу күнүгэр Новосибирскай Судаарыстыбаннай филармониятыгар ыытыллыбыт бырааһынньыктааҕы холбоһуктаах хас да хайысхалаах тэрээһиҥҥэ, буоларын курдук, эмиэ олус көтөөхтүк кытыннылар. Ол курдук, саха култууратын, ырыатын-үҥкүүтүн көрдөрдүлэр. Лариса Михайлова (Сунтаар) Сайа хоһоонугар «Үрүҥ күн оҕолоро» диэн туруорбут композицията, «Урулхан» ыччат уцкуу ансаамбыла ( сал. Дайаана Оконешникова), сахалыы ырыа-тойук филармония киэҥ саалатыгар мустан олорор көрөөччүлэр биһирэбиллэрин ыллылар. «Саха-Сибирь» түмсүү кэнсиэр бырагырааматын Галина Анисимова (Кириэстээх) кыайа-хото салайда.
Маны таһынан фойеҕа ыытыллыбыт быыстапкаҕа биир дойдулаахтарбыт уран оҥоһуктара турдулар. Екатерина Ахметова (Бүлүү) түүлээхтэн тигиилэрэ, Николай Кребс муос оҥоһуктара дьон болҕомтотун тартылар.
Бу араас култуураны, үгэстэри түмэр холбоһуктаах улахан тэрээһиҥҥэ Сунтаартан төрүттээх Сардаана Захарова, Анна Панова икки кыргыттарынаан Настялыын, Словеналыын кытыннылар.
80 саастарын лаппа ааспыт, билигин да ядернай физика билимигэр үлэлии, айа- тута сылдьар убаастанар ытыктанар аксакалбыт Тэҥкэттэн төрүттээх физика билимин кандидата Юрий Игнатьевич Семёнов кэргэнинээн Людмила Ивановналыын кэнсиэри көрөн астынан-дуоһуйан бардылар. Юрий Игнатьевич Академгородоктан Новосибирскайга кэлэригэр бэйэтин массыынатын ыыта сылдьар эбит.
Биир дойдулаахтарбыт, ханна да олохсуйан олорбуттарын, ханна да үлэлии- үөрэнэ сылдьыбыттарын иһин, төрөөбүт Сахабыт сирин баай култууратын, үгэстэрин өрө тутан киэҥ эйгэҕэ биллэрэ, иһитиннэрэ сылдьаллара кэрэхсэбиллээх.
«Сунтаар сонуннара» хаһыат