Бүгүн, олунньу 29 күнүгэр, дойду бэрэсидьиэнэ Владимир Путин Федеральнай сэбиэккэ уонна бар дьонугар анал этиитин иһитиннэрдэ.
Биһиги улууспут дьоно бэрэсидьиэн этиитин сэргээн иһиттилэр. Олор ортолоругар элбэх оҕону улаатыннарбыт, билигин бочуоттаах сынньалаҥҥа олорор кырдьаҕас ийэ Маргарита Саввинова дойду бэрэсидьиэнэ Анал этиитигэр дьиэ кэргэни өйүүр сыаллаах туһаайыыларын үөрэ иһиттэ:
— Быйылгы сылы Арассыыйа бэрэсидьиэнэ Дьиэ кэргэн сылынан биллэрбитин үөрэ истибитим. Дьиэ кэргэн бигэ туруктаах, доруобай эйгэҕэ оҕону иитэр буоллаҕына, биһиги дойдубут инникилээх буоларыгар саарбахтаабаппын. Владимир Путин бүгүҥҥү Анал этиитигэр дьиэ кэргэн туһугар элбэх санаатын, судаарыстыба өттүттэн өйөбүл баар буолуоҕа диэн этиэҕэ диэн эрдэттэн эрэнэ сылдьыбытым ээ. Онтум оннук да буолла. Ол курдук, эдэр ыалы олорор дьиэнэн хааччыйыы соругар дьиэ кэргэҥҥэ чэпчэтиилээх ипотеканы өссө 2030 сылга диэри уһатабын диэбитэ, дьэ бэрт. Ону сэргэ элбэх оҕолоох ыалы өйүүр анал бырайыактар, бырагыраамалар өссө да үлэлиэхтэрин этэн туран, кини хас биирдии дьиэ кэргэн биһиги дойдубут култууратын, үтүө үгэтэрин илдьэ сылдьааччыларынан буолаллар диэн оруобуна эттэ.
Яина ВЛАСЬЕВА