РФ Бэрэсидьиэнэ Федерация Мунньаҕар туһаайбыт Анал этииитин истэн баран Элгээйитээҕи врачебнай амбулатория дириэктэрэ Светлана Конобулова тус санаатын үллэһиннэ:
— Дойдубут бэрэсидьиэнэ Владимир Путин Федерация сэбиэтигэр Анал этиитин иһиттим. Бэрэсидьиэн быйылгы туһаайыытыгар доруобуйа харыстабылыгар сыһыаннаан оҕо төрүөҕүттэн доруобуйатын көрөргө, оҕо доруобуйатын харыстабылыгар болҕомто күүскэ ууруллуоҕун, перинатальнай кииннэр модернизацияланалларыгар үлэ барыаҕын эттэ. Маны таһынан билигин баар оскуолалар 65 эрэ бырыһыаннарыгар медкэбиниэт баарын этэн туран, хас оскуола аайы медицинскэй кэбиниэттэр аһыллалларыгар үбүлээһин баар буолуоҕа диэбитин олус биһирии иһиттим. Дьон доруобуйата тупсарыгар федеральнай бүддьүөт суотугар успуорт саалалары, былаһааккалары, ордук тыа сирдэригэр элбэтэри, чөл олоҕу көҕүлүүрү сүрүн соругунан туруорда.
Тыа сиригэр медицинскэй өҥөнү оҥоруу тупсарыгар үбүлээһин, медицина тэрилтэтэ аныгы оборудованиенан, медүлэһитинэн хааччыллыыта улахан оруоллаах. Кэнники сылларга каадырынан хааччыллыыга федеральнай бырайыактар баар буолбуттара көдьүүстээҕин көрдөрдө диэн бэлиэтиэххэ наада. Инникитин да дьон доруобуйатын эрдэттэн көрдөрүнэн, эмтэнэн олоҕо уһууругар көдьүүстээх үлэлэр ыытылла туруохтарыгар эрэнэбин. Дойдубут бэрэсидьиэнэ бүгүн олох олоруу орто кээмэйин уһатарга үлэ барыахтааҕын, ордук кытыы, тыа сирдэргэ олох хаачыстыбата тупсарыгар болҕомто ууруллуохтааҕын эппитин олус сөбүлүү иһиттим, дьон доруобуйата тупсарыгар туһаайбыт соруктара астыннарар.
Марфа ИВАНОВА