Бэҕэһээ Кириэстээхэ ураты күн буолан ааста. Сарсыардаттан эдэр армеец пуормалаах оҕолор оскуолаҕа сырыстылар,күнүһүн сахалыы таҥныбыт,байыаннай таҥастаах дьон кэлиилэрэ-барыылара элбээтэ.
Дьэ, бу бүгүн Улуу Кыайыы 80 сылынан Кыайыы Знамята биһиги Кириэстээхпитигэр кэлэрин көрсөөрү дьон-сэргэ сүргэлэрэ көтөҕүллэн тэринии-бэринии…
Күнүс 12.00 чааска лоп курдук Знамяны оскуолаҕа киллэрдилэр. Оҕолор,учууталлар эрдэттэн күүппүт, бэлэмнэммит буолан Знамя оскуолаҕа киирэрин үөрэ-долгуйа көрүстүлэр.Ол кэннэ ыйыллыбыт болдьоҕор Кириэстээхпит киин уулуссатынан муусука ньиргийэр тыаһынан Кыайыыбыт болуоссатыгар күүтүүлээх Кыһыл Знамябытын үөһээ күөрэччи тутан аҕалан иһэллэрин мэҥэ бэлиэҕэ мустубут,ордук аҕам саастаах дьон сүрэхтэрэ битигирии тэбэн,долгуйан,үөрэн көрүстүлэр.
Кыыһар Кыһыл Знамяны көрөн ааспыт ыарахан оҕо саастарын,кыһалҕа кыһарыйбыт кэмнэрин,тыылга ыарахан үлэ,төрөппүтү сүтэрии ,сэрии алдьархайын эттэринэн-хааннарынан билбит,оонньомотох оҕо саастаах маҥан баттахтаах ытык кырдьаҕастарбытыгар долгутуулаах түгэн.
Оччотооҕу кэмҥэ төһөлээх элбэх дьон сэрии бүтэн Кыайыы Знамята күөх халлааҥҥа күөрэйиэн баҕарбыта буолуой?..
Болуоссака дьон-сэргэ тоҕуоруһа муһуннулар. Арассыыйа Үлэ Дьоруойа В.АМихайлов,Чурапчы көһөрүүтүн кыттыылааҕа Т.О.Платонова,тыыл бэтэрээнэ 90 саастаах Е.С.Иванова кэлбиттэрэ көрсүһүүнү өссө суолталаата.»Утум»түмсүү (сал.Лилия Игнатьева)остуол тардан,алтан салабаар оргутан,алаадьылаан,лэппиэскэлээн,төгүрүктүү буспут хортуоскалаан саллаат остуолун бэлэмнээбиттэр,итии чэйинэн кэлбит дьону күндүлээтилэр. Ол иһин, дьон кэтэһиигэ тоҥмокко итии чэйинэн сылытынан,сэлэһэ түһэн бэлиэ күн көрсүһүүтэ өссө интэриэһинэй буолла.
Знамяны оскуола бастыҥ үөрэнээччитэ,спортсмен Володя Тотонов күөрэччи тутан киллэрдэ,умайа турар сулуска грилянда уурулунна,залп ытылынна.
Нэһилиэк Аҕа баһылыга Александр Григорьев эҕэрдэ тылынан саҕалаата,улуус баһылыгын социальнай боппуруостарга солбуйааччы А.И.Иванов,улуус кырдьаҕастарын сэбиэтин бэрэсэдээтэлэ А.К.Васильев,Куокуну нэһилиэгин баһылыга Л.П .Михалев кэлбит дьоҥҥо туһаайан тыл эттилэр.
Анал байыаннай дьайыыга бойобуой сорудах толоро сылдьан суох буолбут буойуттар Вася,Семен Антоновтар,Веня Пойдютов ийэлэригэр «Аҕа Дойдуну көмүскээччи ийэтигэр»диэн өйдөбүнньүк мэтээллэри туттардылар.
Бэлиэ күн хаартыската суох сатаммат кэлбит дьон бары Знамяны кытта бу үбүлүөйдээх сылы өйдүү-саныы сылдьарга хаартыскаҕа хатаннылар.
Салҕыы Миирнэй куорат кыраныыссатыгар тиийэн улуус аҕа баһылыга А.В.Григорьев ыаллыы Мирнэй куорат бэрэстэбиитэллэригэр туттарда.
Кыһыл Знамя салҕыы айанныы турда.
Августина ПЛАТОНОВА