Кириэстээх нэһилиэгэр саҥа үлэҕэ киирбит култуура киинигэр көһүү үгэнэ. Маныаха тиэйэр – таһар үлэҕэ субуотунньук биллэриллибитэ. Сүрүн сорук бибилэтиэкэ фондатын көһөрүү буолла. Манна оскуола кэлэктиибин эр дьоно (директор Евгений Тараяров), үрдүкү кылаас уолаттара кыайа – хото көмөлөстүлэр.
Икки улахан бырыһыаптаах массыынаҕа суоппардар Николай Анисимов, Эдуард Дарвидонов, УАЗ фургон Виктор Игнатьев, НИВА Никандр Григорьев, кулууптан таһаҕас тиэйэргэ РЭС кэлэктиибэ кузовтаах ГАЗ массыынанан (начальник Иван Сидоров, суоппар Анатолий Данилов) үлэлээтилэр. Элбэх куруусчуттардаах буолан хас да сиртэн тиэнэн үлэ дөбөҥнүк түмүктэннэ.
Санатан эттэххэ, бу иннинээҕи күннэргэ суоппардар Иван Назаров, Василий Васильев чааһынай техникаларынан, куруусчуттар Айтал Попов табаарыстарынаан, Валентин Румянцев , РЭС кэлэктиибэ (начальник Иван Сидоров) эмиэ миэбэл тиэйиитигэр – таһыытыгар улаханнык көмөлөспүттэрэ.
Үлэҕэ наар инники сылдьар кэлэктииптэргэ, биирдиилээн дьоммутугар махтал истиҥ тылларын аныыбыт.
Ити курдук бары кыттыһан тэриннэхпитинэ көхтөөх субуотунньуктарынан үлэ – хамнас үмүрүйэр.
Людмила ДАНИЛОВА, Кириэстээх