Сунтаар улууһугар уһун унньуктаах ардахтар түһэннэр, намыһах сирдээх оттуур ходуһалар ууга бардылар. Саха киһитигэр саамай суолталаах, кыстыгы быһаарар от үлэтин кэмигэр, бу курдук, айылҕа уустук турукка киллэрдэ. Сүүнэ ходуһалар, оттоох күрүөлэр бүтүннүү уу анныгар сыталлар.
Улуус баһылыга Анатолий Григорьев, Эдуард Филиппов уонна тыа хаһаайыстыбатын управлениетын салайааччыта Владимир Анисимов оттуур сирдэри көрдүлэр. Кинилэр чопчу Бэрэ, Көрдүгэн, Ураһалаах уонна Ойбон Күөл ходуһаларыгар сырыттылар. Быһыы-майгы сытыырхайбыта харахха тута быраҕыллар. Отчуттар ходуһаҕа киирбиттэр эрээри, сир-уот ууга сытар буолан үлэ тахсыбат туруктанна.
Салалта уонна исписэлиистэр ходуһалартан ууну хайдах ыытыахха сөптөөҕүн уонна хайысхатын быһаарар сыалтан урукку хоруулары көрдүлэр. Көрүү түмүгүнэн ууну түһэрэр сөптөөх ханаал тобулунна. Билигин уталытыллыбат соругунан ол хоруулары хаһыы, ууну ыытыы буолар. Маныаха улуус салалтата анал субуотунньук тэрийэргэ быһаарда.
Күүһү түмэн, ууну түһэрдэххэ эрэ улуус отчуттара кыстык отторун булунар кыахтаныахтара.
Сунтаар улууһун дьаһалтатын пресс-сулууспата