Өр сылларга Сунтаар килбэйэр киинигэр үлэлии турбут Киин бибилэтиэкэ дьиэтэ аварийнай туруктанан, уруккута «Березка» уһуйаан дьиэтигэр көһөн киирдэ.
Билиҥҥи туругунан эргэ бибилэтиэкэттэн 60 тыһ. пуонда кинигэ көһөн кэлэн, наардааһын уонна сааһылааһын үлэтэ бара турар. Үтүмэн элбэх кинигэни тиэйиитэ, таһыыта, өрөмүөн үлэтэ бибилэтиэкэ бэйэтин үлэһиттэрин күүһүнэн ыытыллар. Биллэн турар, бибилэтиэкэ үгүс үлэһиттэрэ кэрэ аҥаар, ону ол диэбэккэ ыарахан үлэттэн толлон турбаккалар, үп-харчы кырыымчыгынан элбэх үлэни бэйэлэрэ үмүрү туттулар. Урукку уһуйаан дьиэтэ син сэнэх туруктаах да буоллар, эбии электропроводканы уларытыы, саҥаттан интернет ситимин тардыы, полкалары оҥоруу үлэтэ тэриллэр.
Ол да буоллар, алтынньы 15 күнүттэн, бибилэтиэкэ ааҕааччыны кытары үлэтин саҕалаата. Үлэһиттэр саҥа үлэлиир сирдэрин тупсарыыга бэйэлэрэ кыттыһаллар. Ол курдук, хас биирдии салаа бэйэлэрин хосторун харчы бырахсан кырааска үлэтин ыытан тупсардылар.
Этиэххэ баҕарыллар, бибилэтиэкэ көһүүтэ быйыл саамай үп-харчы ыарахан кэмигэр түбэһэн үгүс күчүмэҕэйдэри көрүстэ, маныаха Сунтаар нэһилиэгин тэрилтэлэрэ, урбаанньыттара уонна биирдиилээн дьон күүс-көмө буоллулар, түгэнинэн туһанан кинилэргэ махтал тылларбытын тиэрдэбит: «Сунтарцеолит» ХЭТ сал. Попов П.М., “Сайдам” маҕаһыын сал. Павлова М.С. “Виктория” маҕаһыын, ИП «Исаев А.Э.», «Сунтаравтодор» сал. Тен Д.Д. «Сунтаардааҕы технологическай колледж» сал. Филиппов А.А., Сунтаар култууратын улуском бэрэссэдээтэлигэр Амонова Е.С., Сунтаар 1№-дээх оскуола 10 “В” кылааһын үөрэнээччилэригэр (Сал. Кокарева Е.А.).
Кырачаан ааҕааччыларбыт эмиэ туора турбатылар бэйэлэрин сэмэй көмөлөрүн Рудик, Альберт, Артем оҥордулар. Ону тэҥэ, бибилэтиэкэ доҕоро, эрэллээх ааҕааччыта Роберт Егорович Софронов күүс-көмө буолла. Сунтаар улууһун култууратын эр дьоно тиэйии-таһыы үлэтигэр көмөлөстүлэр.
Лена ФЕДОРОВА,
Сунтаар киин бибилэтиэкэтин үлэһитэ.