Петр Меркурьевич 1926 сыллаахха уруккута Омот – Омоттоон нэһилиэгэр Бээкимдэ диэн сиргэ дьадаҥы дьиэ кэргэҥҥэ төрөөбүтэ. 9 саастааҕар Хоро начаалынай оскуолатыгар үөрэнэ киирэр, 1938 сыллаахха бу оскуоланы бүтэрэр.
Ол кэнниттэн Элгээйигэ киирэн үөрэниэхтээҕин төрөппүттэрэ ыалга олордон үөрэттэрэр кыахтара суох буолан, салгыы үөрэммэккэ хаалбыта. Онтон ыла 13 саастаах оҕо холкуоска үлэлээн айаҕын ииттэргэ күһэллибитэ, үөрэх сырдык аартыгын салгыы дабайар кыаҕа суох буолбута. 1944 сылга Сэбиэскэй Аармыйа кэккэтигэр ыҥырыллан, уҥуоҕунан кыра буолан Тиксиигэ үлэ фронугар ыыппыттара, онтон 1945 с. сэтинньи ыйга төннөн кэлбитэ. Ити кэмтэн ыла холкуос араас үлэтигэр үлэлиир. Эдэр, үлэҕэ дьоҕурдаах уолу 1947 с. холкуос бөдөҥсүйбүтүгэр уопсай мунньаҕынан уураахтаан материальнай эппиэттээх үлэҕэ кладовщигынан аныыллар, ол кэмҥэ учуот олус кытаанах кэмэ этэ, сылга иккитэ инвентарь усталлара. 1950 с. Хоро нэһилиэгин Сэбиэтин бэрэссэдээтэлинэн талыллыбыта. Хомсомуол тэрилтэтин бюротын чилиэнэ этэ. Сэбиэт бэрэссэдээтэлинэн Хоро нэһилиэгэ Элгээйигэ холбоһуор диэри үлэлээбитэ. 1957 сылтан партия чилиэнэ буолуоҕуттан партия ханна ыытар да, онно үлэлиирэ. 1955 сылтан 1982 сылга диэри тохтоло суох биригэдьииринэн үлэлээн баран биэнсийэҕэ тахсыбыта, бочуоттаах сынньалаҥҥа олордор даҕаны биригэдьиири солбуйара. Өр сылларга биригэдьииринэн үлэлээбит, кыра үөрэхтээх практик-биригэдьиир, колхуоһунай-совхоһунай тутуу бэтэрээнэ биир идэҕэ өр сылларга үлэлээбитэ эдэр каадырдарга чулуу холобур буолара. Дьон ахтыытыгар Петр Меркурьевич түөрт кылаастаах үөрэхтээх киһиттэн чахчы айылҕаттан дьону кытта тапсан үлэлиир, үлэни таба тэрийэр, дьаһайар талааннаах биригэдьиир олорон ааспыта диэн этиллэр.
Кини курдук 40 сыл биригэдьиир сыралаах, ардыгар араас быһылааннардаах, үөрүүлээх да кэмнэрдээх үлэҕэ үлэлээбит киһи өрөспүүбүлүкэҕэ аҕыйаҕа буолуо.Петр Меркурьевич өр сыллаах эҥкилэ суох үлэтин партия, Бырабыыталыстыба үрдүктүк сыаналаабыттара. В.И.Ленин 100 сылын бэлиэтиир юбилейнай уонна үлэ бэтэрээнэ мэтээллэринэн, РСФСР тыа хаһаайыстыбатын министиэристибэтин Бочуотунай грамотатынан, партия, хомсомуол райкомнарын, райсовет исполкомун бочуотунай грамоталарынан наҕараадаламмыта.
Петр Меркурьевич элбэх оҕолоох ыал аҕата, элбэх сиэннэрдээх, хос сиэннэрдээх дьоллоох эһээ буолар. Кини уон оҕону соҕотоҕун иитэн, үөрэтэн олоххо суолларын ыйан биэрбитэ. Оҕолоро билигин бары араас идэни талан, үлэлээн-хамсаан, олохторун булан сорохторо бочуоттаах сынньалаҥҥа олороллор. Аҕаларын аатын үйэтитэн 2003 сылтан Хоро нэһилиэгин оскуолатын бүтэрээччи выпускникка үөрэххэ баралларыгар анаан сыл аайы бэриллэр бириэмийэ олохтообуттара номнуо 21 сыл буолла. Бу бириэмийэ эдэр ыччат олоххо оннун булан сөбүлүүр идэлэрин талан үөрэнэллэригэр, төрөөбүт дойдуларыгар туһалаах дьон буолалларыгар ананар.
Лидия Герасимова.
Хаартыскалар Л. Герасимова тус архыыбыттан туһанылыннылар.