Быйыл сайын Сунтаар улууһугар нуорматтан элбэх ардах түһэн муниципальнай таһымнаах ыксаллаах быһыы-майгы эрэсиимэ олохтоммута. Сир-дойду ууга баран өрөспүүбүлүкэ уонна муниципальнай суолталаах айан суоллара алдьаммыттара, ону тэҥэ нэһилиэк иһинээҕи уулусса суоллара, оттуур ходуһалар, ыал тэлгэһэлэрэ бүтүннүү ууга былдьаммыттара. Билигин да үгүс хоромньуну туоратыыга былааннаах үлэлэр тиһигин быспакка ыытылла тураллар.
Сунтаар нэһилиэгэр ордук, күөл аттынааҕы, Томуһукаан, Хомустаах түөлбэлэрин олохтоохторо уонна өрүс кытылын үрдүгэр олорооччулар суола-ииһэ суох хаалбыттара. Ити кэмтэн ыла сөптөөх үлэ баран СӨ тырааныспарга министиэристибэтин уонна Бырабыыталыстыба өйөбүлүнэн, бу күннэргэ нэһилиэк иһинээҕи алдьаммыт-кээһэммит суоллары чөлүгэр түһэрии үлэлэрэ ыытылыннылар.
Семен Николаев, Сунтаар нэһилиэгин баһылгын солбуйааччы:
– Сунтаар нэһилиэгэр уопсайа 9 уулусса суола алдьаммыта. Тахсыбыт хоромньуну барытын ааҕан-суоттаан СӨ тырааныспарга министиэристибэтигэр сайаапка ыыппыппыт. Ол курдук чөлүгэр түһэрэр үлэ чэрчитинэн саамай улаханнык алдьаммыт 5 суолга харчы көрдүлэр. Маны таһынан олорор дьиэлэрэ, хаһаайыстыбалара ууга барбыт 372 киһиэхэ СӨ үлэҕэ уонна социальнай көмүскэлгэ министиэристибэтэ эмиэ үбүнэн көмө буолбуттара. Онон сиэттэрэн, СӨ Бырабыыталыстыбатыгар, СӨ тырааныспарга министиэристибэтигэр уонна СӨ үлэҕэ уонна социальнай көмүскэлгэ министиэристибэтигэр махталбытын биллэрэбит.
Суолу чөлүгэр түһэрэр үлэни 3 бэдэрээтчит ылсан бу күннэргэ күүстээх үлэ барда. Баараҕай тиэхиньикэлэринэн кумах, гравий кутуллан сирэ дэхсилэннэ.
Өрүс кытылын бөҕөргөтүүгэ эмиэ туспа үлэ барар. Ол курдук, дохсун ардах кэнниттэн Бүлүү эбэ кытыла 18 сиринэн суураллан сиҥнэн түспүтэ. Билигин СӨ айылҕа харыстабылын министиэристибэтин кытта ситимнээх үлэ бара турар.
“Кытылы бөҕөргөтүүгэ үгүөрү үп-харчы наада. Ол курдук 90-тан тахса мөл. суумалаах үлэ барыахтаах. Билигин улахан бырайыакка үлэлэһэ сылдьабыт. Биир эмэ бырагыраамаҕа хапсарбыт буоллар, бөҕөргөтүү үлэтэ тэтимириэ этэ”, – диэн Семен Николаев эбэн эттэ.
Елизавета ТИТОВА