Бука барыгытын мэдиссиинэ үлэһиттэрин идэлээх күнүнэн уонна Сунтаар улууһугар доруобуйа харыстабыла тэриллибитэ 110 сыллаах үбүлүөйүнэн ис сүрэхпиттэн итиитик-истиҥник эҕэрдэлиибин!
Эмп үлэһиттэрин күнэ биһиги дойдубутугар, үгэс курдук, сылын аайы олохторун дьон-сэргэ олоҕун, доруобуйатын харыстабылыгар анаабыт үтүө үлэлээх дьон бырааһынньыгын быһыытынан бэлиэтэнэр. Доруобуйа харыстабылын үлэһиттэрэ ордук бу күн дьон олоҕор улахан суолталаах, наадалаах дьоһун идэлээхтэрин өйдүүллэр, талан ылбыт идэлэринэн, ситиһиилэринэн киэн тутталлар.
Былыр-былыргыттан киһи доруобуйатын төннөрөр, чөлүгэр түһэрэр үтүө дьыала дьон-сэргэ ортотугар улаханнык ытыктанар, бочуоттанар этэ. Эмчит идэтэ – үрдүк идэтийиини эрэ эрэйбэт, ураты, дьиҥ киһиэхэ чугас хаачыстыбалары: аһыныгас, амарах, болҕомтолоох, ханнык да кэмҥэ көмөҕө кэлэргэ бэлэм буолууну ирдиир идэ.
Күн бүгүн доруобуйа харыстабылын эйгэтигэр үгүс уларыйыылар киирэллэр – эмтиир тэрилтэлэрбит базалара тупсар, быраастар, сиэстэрэлэр идэтийиилэрин таһыма үрдүүрүгэр саҥа кыахтар көстөллөр. Бу биһигини инникитин өссө таһаарыылаахтык, көдьүүстээхтик үлэлиирбитигэр кынаттыыр.
Күндү биир идэлээхтэрим! Бэйэни харыстаммат үтүө суобастаах үлэҕит, талааҥҥыт, маастарыстыбаҕыт, үрдүк аналгытыгар бэриниигит, дьоҥҥо болҕомтоҕут, тапталгыт иһин ис сүрэхпиттэн махтанабын.
Эһиги күн аайы чиэстээхтик үлэлээн, киһиэхэ саамай күндүтүн – доруобуйатын уонна олоҕун – быыһыыгыт.
Хорсун быһыыгыт, уйаҕас сүрэххит уонна үтүө илиигит иһин түмэн дириҥ махтал тылларын этэбин. Дьоҥҥо олоҕу, доруобуйаны бэлэхтиир ыарахан, эппиэтинэстээх үлэҕитигэр ситиһиини, күүһү-уоҕу, кытаанах доруобуйаны уонна дьиэ кэргэҥҥитигэр дьолу баҕарабын!
Константин Павлов, Сунтаардааҕы киин балыыһа кылаабынай бырааһа.