Хас биирдии киһи доруобуйата ыраас ууну иһэриттэн тутулуктаах. Биһиги эбэбит уута мэлдьи ыраас буолбат, саас халаан уутугар, сайын хара уутугар киртийэр. Ыраас уу боппуруоһа сытыытык турбут кэмигэр өрөспүүбүлүкэ үрдүнэн «Ыраас уу» тосхолунан сир анныттан ууну хачайдаан таһаарар скважинатын чөлүгэр түһэрэн, биир таһымнаах үлэ оҥоһулунна.
Сибэккилээх сыһыылардаах, сиэркилэ буолар күөллэрдээх Сиэйэбитигэр сир анныттан ыраас ууну таһаарар уу скважинатын (куруойун) арыйар дьоро күн буолла. Бочуоттаах, дьоһуннаах быраабы Сиэйэ нэһилиэгин аҕа баһылыгар Александр Романовка, куруой үлэтин саҕалаабыт, бу иннинэ баһылыгынан үлэлээн ааспыт Алексей Обоюков кэргэнигэр Римма Обоюковаҕа, бу үлэ түмүктэнэригэр, ол эбэтэр дьиэ уотун, уотунан ититиитин, уу ситимин чөлүгэр түһэрбит дьаһалта биир тутаах үлэһитэ Андрей Афанасьевка аалай кыьыл лиэнтэни быһар чиэс тигистэ.
Манна даҕатан этэр буоллахха, 2018 сыл атырдьах ыйын бүтэһигэр Ирэлээх үрэҕэр АЛРОСА хампаанньа Мииринэй ГОК-тын котлованнара ардах уутун таһыма үрдээн, халааннаан тахсан Бүлүү эбэбитин киртиппитэ.
Өрөспүүбүлүкэ үрдүнэн Бүлүү Эбэ чөлүгэр түһүөр диэри «Ыраас уу» бырагырааматын ылыныы буолбутугар, ол кэмҥэ аҕа баһылыктыы олорор Алексей Обоюковтыын сөбүлэһэн, ылынан ол бырагыраамаҕа киирэрин ситиспиппит .
Ол кэннэ 2020 сылга ППМИ бырагырааматыгар киллэрэн уот ситимин баҕаналарын ИП Валерий Макаров туппута. Онтон бу кэмҥэ диэри электроуот ситимэ, трансформатор испытаниены барбаккалар турбуттара. 2023 сылтан олохтоох дьаһалта, Олох-дьаһах хомунаалынай хаһаайыстыба министиэристибэтэ, «Якутскэнерго» ПАО бииргэ үлэлэһиилэрин түмүгэр бу сылтан көҥүл ылан уот ситимэ киирдэ.
Онон нэһилиэкпит дьоно-сэргэтэ сир анныттан кэлэр ууну иһэр уонна олоххо-дьаһахха туһанар уу курдук төһө баҕарар туттуохпутун сөп. Улахан стратегическай таһьымнаах боппуруос быьаарылынна.
Уу — биһиги олохпут күүһэ. Бу тутуу сиэйэлэр кэлэр кэнчээри ыччакка улахан хаһааспыт, бэлэхпит буолар !
Бүгүҥҥү күҥҥэ- Айхал!
Туруорсубут, үлэлэспит дьоҥҥо — уруй!
Олохтоохтор үөрүүбүт муӈура суох!
Зоя СЕМЕНОВА, Сиэйэ