Бэҕэһээ олоҥхо дойдута Сунтаарга Сэргэй Сибиэрэп күнүн бэлиэтээтибит. Сунтаар Дархан, Далбар оһуокайдьыттара, чуор тойуксуттара, чаабы-чыыбы чабырҕахсыттара, ким да хаалбакка, саха фольклорун этигэр-хааныгар иҥэрэн илдьэ сылдьааччы бастыҥ дьоммут үгүстэрэ дьоллоох Дьокуускай куоракка «Тоҕус томтордоох оонньууларга» бараннар, мэктиэтигэр Сунтаар кураанахсыйбыкка дылы буолбут кэмигэр, манна дойдубутугар хаалбыт дьон улуу киһибит үтүмэн үөрүүлээх, үрдүк өрөгөйдөөх күнүн бэлиэтиэххэ диэн, Сибиэрэп уораҕайыгар тоҕуоруһа муһуннубут, бэлэмнээбит миэстэлэрэ тиийбэккэ эбии устуул таһааһыннаах.
Дьэ, манна көһүннэ ээ, биһиги суон сурахтаах сунтаардар буоларбыт. Уруккута Сунтаар улууһун култууратын салайан олорбут хотуммут Мария Тараярова киэҥ холку куолаһынан дьоро күнү арыйаатын кытта, бүтүн Саха сирин үрдүнэн тэҥнээҕэ суох, Сибиэрэби суоллуур, Айсен Федоровпыт Сибиэрэп айымньыларыттан ыркый ойуур быыһыттан ымыы чыычаах буолан, улуу Москубанан эргитэн сүрэхпитин үөрдэн, һарсын һарсыардабыт саргытынан сүргэбитин көтөҕөн туойан доллоһутта эбээт. Аатырар «айархааннардыын» бииргэ хомустаспыт Надежда Спиридонова хомуһун тыаһа эчи үчүгэйин. Онтоон, «Чебурашка», «Ньургуһун» уһуйаан оҕолоро чабырҕахтаан чаҕаардылар. Бачча сааспар диэри араас толорууну көрдүм ини, көрбөтүм ини. Бу Надежда Спиридонова салайар чабырҕахсыттарын бөлөҕө — оһуобай. Бу уос-тиис оҥостон, туттуу-хаптыы буолан чабырҕахтаан чаҕылыттылар. Таҥастарыттан, баттахтарыгар тиийэ толкуйданан туруорбуттара олус. Бу саҥалара чуолкайын. Хаарыаны бу отой бэлэм кэлэктииби ыспакка биир оскуолаҕа, биир кылааска киллэрбит, айар кутттаах учууталга туттарбыт киһи дии санаатым.
Дьэ, силигин ситэрэн, көстөр үтүө дьүһүннээх Наталья Эконова таҥара табатын курдук таҥнан-симэнэн тахсан «Көҕөн кус кыыс» олоҥхотун толордо эбээт. Бу мантан мин орто туруу бараан дойду саҥа айылларыгар үөһэ дойдуттан көҕөн кус түһэн үс сымыыты сымыыттаан үс бухатыыры төрөппүтүн өйдөөтүм. Салгыы хайдах-туох буолалларын табыгастаах олох маска олорон дуу, эбэтэр өттүгэстии түһэ сытан истибит киһии дии санаатым. Наталья Эконова 4 -10 чаас устата олоҥхолуон сөптөөх олоҥхону толорооччу. Билиҥҥи кэмҥэ үс улахан олоҥхону төбөтүгэр илдьэ сылдьан толорорун билэбит. Дьоро күммүтүтүгэр олоҥхо истэ-истэ, Сунтаар бастыҥ алаадьыһыттара Галина Васильева, Мария Тараярова оҥорбут уоһах, саҥыйахтаах, онтон да араас алаадьыларын астына, тото сиэтибит. Онтон оҕолорбут сабыс -саҥа тэриллибит Аан дойдутааҕы Хомуһу үөрэтэр киин филиалыгар сырыттылар. Биһиги бастакы этээскэ түһэн оһуокайдаан ойдубут. Улахан ойуун баарыгар кыра ойуун кыырбат диэн сиэринэн дарханнар, далбардар суохтарыгар оторой-оторой да оһуокайдьыт оһуокай таһааран көрүөм дуу диэбитим чугаһаппатылар, этээччи элбэх, онон астына оһуокайдаатыбыт.
Дьэ, бу курдук улуу Сергей Зверев күнүн сунтаардар улуу уораҕайбытыгар эдэрдиин-эмэнниин, улуус киинин, тыаларын олохтоохторо кыттыылаах , урукку култуурабыт хотуна хоннохтоохтук тэрийэн, Саха сиригэр биллэр Айсеммытынан айхалланан, улахан олоҥхоһут Эконованан эҥэрдэнэн, иннилэригэр киэҥ аартыктар, үрдүк үктэллэр күүтэр эдэр талааннарынан тулаланан олус бэркэ атаардыбыт.
Зинаида Федотова — Дьол Кыыма