Сүүрүү киһи этин-сиинин чэбдигирдэр, санааны сааһылыыр, киһи чөл, бөҕө туруктаах буоларыгар көмөлөөх. Сүүрүүнэн дьарыктанар киһи мэлдьи үчүгэй настарыанньалаах, туруоруммут сыалын ситиһэр, тулуурдаах, дьулуурдаах буолар. «Сүүрүү киһиэхэ тугу биэрэрий?» диэн сүүрүүнэн утумнаахтык дьарыктанар дьонтон туоһуластыбыт.
Диана Иванова — сүүрүүнү таптааччы: «Мин сүүрүүнэн дьарыктаммытым быйыл 10 сыла. Кэргэмминээн Алексейдыын сүүрүүнү олус таптыыбыт. Сүүрүү биһигини холбообута, дьоллообута. Ордук сибиэһэй салгыҥҥа уонна ыраах дистанцияҕа сүүрэрбитин сөбүлүүбүт. Сүүрүүнэн дьарыктанар киһи бэйэтин тургутан көрөр, кыаххын бэрэбиэркэлэнэҕин, азарт үөскүүр. Ону тэҥэ, саамай сүрүнэ доруобуйаҕа туһалаах. Биһиги дьиэ кэргэн Өрөспүүбүлүкэ уонна Кыайыы күннэрин кросс сүүрэн бэлиэтиир үтүө үгэстээхпит. «Сунтаар сонуннара» эрэдээксийэ ыытар сүүрүүгэ күрэҕин хаһан да көтүппэппит. Үбүлүөйдээх 30-с төгүлүн ыытыллар күрэххэ ким быһый, түргэн кыайдын! «.
Герман Иванов — култуура үлэһитэ, биллэр тамада: «Мин биир сиргэ таба олорбот майгылаахпын, түргэн-тарҕан туттунуулаахпын. Ол иһин да буолуо сүүрүүнэн оҕо сааспыттан дьарыктанан саҕалаабытым. Оскуолаҕа үөрэнэр кэммэр сүүрүүгэ кэккэ ситиһиилэрдээхпин. Устудьуоннуу да сылдьан сүүрүүгэ мээнэ ситтэрбэт этим. Билигин компьютерга олорор үлэлээхпин. Ол иһин, сарсыарда эрдэ тураммын сүүрэн саҕалаатым. Сибиэһэй салгыҥҥа сүүрэрдээҕэр ордук суох. Доруобуйам, күннээҕи настарыанньам биллэ тубуста, күннэтэ чэгиэн, сэргэх сылдьабын. Марафоҥҥа кыттар баҕа санаалаахпын. Хаһан эмит бу ыра санаабын толоруом! »
Валентина Прокопьева 3 сыл эргиччи Сунтаар улууһугар бастыҥ спортсмен аатын ылбыт сүүрүк: «Эдэр сааспар улуус аатын сүүрүү көрүҥэр элбэхтик көмүскээн турардаахпын. Сунтаарга сүүрэр сылларбар кимиэхэ да ситтэрбэтэҕим. Бу мин киэн туттуум уонна ситиһиим буолар. Билигин төһө да элбэх ахсааннаах мэтээллэрим, кубоктарым ыраах сытталлар сүүрүүнү олус таптыыбын. Сүүрүк спортсменнары кэтээн көрөбүн, кинилэр ситиһиилэриттэн олус үөрэбин. Сүүрүү киһиэхэ бастатан туран дисциплинаны биэрэр, сыалы ситиһэргэ, ыарахантан чаҕыйбат буолууга үөрэтэр. Онон сүүрүнэн дьарыктаныҥ, доруобай, чэгиэн буолуҥ. «Сунтаар сонуннара» ыытар күрэхтэһиитигэр кыттыҥ! »
Улуу Кыайыы күнүн бэлиэтиир өрөгөйдөөх күнүгэр «Сунтаар сонуннара» эрэдээксийэ үгэскэ кубулуйбут сүүрүү күрэҕин ыытар. Ааҕааччыларбыт көхтөөх кыттыыны ылыаххыт диэн эрэнэбит!
Үбүлүөйдээх сүүрүү күрэҕэр харчынан, бирииһинэн көмөлөспүт тэрилтэлэрбитигэр, дьоммутугар «Татыйыына» фирмаҕа, сүүрүү федерациятын бэрэссэдээтэлигэр Игнат Яковлевка, эрэллээх ааҕааччыбытыгар Алексей Седалищевка, Валентин Файрушиҥҥа, сэрии бэтэрээнэ Прокопий Степанов оҕолоругар, «Сунтаар сонуннара» бэтэрээннэригэр, «Сайдам», «Виктория» атыы-эргиэн дьиэлэригэр барҕа махталбытын тириэрдэбит.
«Сунтаар сонуннара» чөл-чэбдик олоҕу көҕүлүүр!
Мира АФАНАСЬЕВА