П.Х.Староватов аатынан Элгээйи орто оскуолатыгар Уйбаан Нуолур аатынан Элгээйи модельнай, К.Е.Иванов аатынан оскуола бибилэтиэкэлэрин тэрээһиннэринэн сылын аайы ыытыллар » Уһулуччу өйдөөх » интеллектуальнай оонньуу — күрэс 5 — 8 кылаастар үөрэнээччилэрин ортотугар ыытылынна. Быйылгы күрэс уратыта Сунтаар улууһа сурукка киирбитэ 225, Элгээйи нэһилиэгэ төрүттэммитэ 255 сылларыгар ананна. Күрэскэ өркөн өйдөрүн тургутан көрүөн баҕалаах 9 оҕо кытынна. Оонньуу 5 түһүмэҕинэн ыытылынна. 1 турга дьиэтээҕи сорудахха бэркэ бэлэмнэнэн, о5олор бэйэлэрин билиһиннэрдилэр. 2 турга 21 араас тиэмэҕэ 3 эппиэттэн сөптөөҕүн талар сорудаҕы толорон, үс аҕыйах бааллаах туораата. 3 турга Сунтаар улууһа сурукка киирбитэ 225 сылыгар билиини тургутуу боппуруостара буоллулар, 4 тур Элгээйибит нэһилиэгэ төрүттэммитэ 255 сылыгар ананна. Уонна 4 түһүмэх түмүгүнэн 2 элбэх баалы ылбыт бастыҥ үөрэнээччилэр Олеся Степанова, Дуолан Михайлов финалга тахсан күөн көрүстүлэр. Финалга бары соһуйуохпут иһин, саамай кыра кыттааччылартан биирдэстэрэ, шахматист, дуобатчыт 5″б» кылаас үөрэнээччитэ Дуолан Михайлов кыайан барыбытын сөхтөрдө уонна оскуолабыт директора Софья Васильевна Игнатьева сылын аайы туруорар «Сир уустара» лааҕырга босхо сынньанар путевка, кыайыылаах кубогын тутан, өрөгөйө үрдээтэ. Күрэс түмүгүнэн 2 миэстэни 8 кылаас үөрэнээччитэ Олеся Степанова, 3 миэстэни 5″а » кылаас үөрэнээччитэ Семен Спиридонов, «Төрүөбүт түөлбэ историятын билии» анал ааты 7 кылаас үөрэнээччитэ Никита Никитин, «Кыайыыга дьулуур иһин » анал ааты 8 кылаас үөрэнээччитэ Арчын Кузьмин ыллылар, кыттыбыт оҕолор да хаалсыбакка сертификат, саҥа кинигэ, минньигэс бириис тутан, төрүөбүт улуустарын, нэһилиэктэрин туһунан эбии элбэҕи билэн, Уйбаан Нуолур аатынан модельнай бибилэтиэкэ үлэһиттэригэр, оскуолабыт директорыгар махталлара муҥура суох.
Людмила ПАВЛОВА Элгээйи орто оскуолатын саха тылын, литературатын учуутала
