Олунньу 13 күнэ Саха сирин үрдүнэн төрүөбүт тыл уонна сурук-бичик күнэ. Бу күн «Оһуор» Култуура киинигэр Сунтаар улууһун номоҕун уонна сайдыытын, Элгээйи нэһилиэгэ төрүттэммитэ 255 сылларынан тэрилтэлэр, түмсүүлэр икки ардыларыгар үгэс буолбут “Аман өс” куолуһуттар күрэстэрэ ыытылынна. Тэрийээччилэр: «Оһуор» Култуура киинэ, Уйбаан Нуолур аатынан Элгээйи модельнай бибилэтиэкэтэ. Күрэскэ барыта 7 хамаанда кыттыыны ылла.
Күрэс түөрт түһүмэҕинэн ыытылынна: I түһүмэх – бэйэни билиһиннэрии, II түһүмэх – тиэмэни тардан ылан тыл этии, куолулааһын, III түһүмэх – Сунтаар улууһун, Элгээйи нэһилиэгин устуоруйатын билиигэ тургутук, IV түһүмэх – Элгээйи нэһилиэгин инники сайдыытын туһунан бэйэ көрүүтэ. Кыттааччы хамаандалар кыһаллан бэлэмнэнэн, сахалыы сайбаччы таҥнан, санааларын сааһылаан сайа этэн, тиэмэлэрин толору арыйдылар. Тэрээһини сүрүн бибилэтиэкэр Татьяна Семенова иилээн-саҕалаан ыытта.
Дьүүллүүр сүбэҕэ үлэлээтилэр: «Оһуор» Култуура киинин режиссера, Элгээйи нэһилиэгин бочуоттаах олохтооҕо Эльвира Николаева; олохтоох ааптар, нэһилиэк бочуоттаах олохтооҕо, “Ньургуһун”,”Кулуһун” литературнай түмсүүлэр чилиэннэрэ – Маргарита Заболоцкая; “Көмүс саас” түмсүүттэн эргиэн үлэтин бэтэрээнэ Изабелла Петрова; тыа хаһаайыстыбатын специалиһа Матрена Самойлова; Элгээйи орто оскуолатын алын сүһүөх кылаас учуутала Виктория Федотова.
Дьүүллүүр сүбэ быһаарыытынан «Кылаан кыайыылаах» анал ааты ылыан ылла «Төлөн» хамаанда (Элгээйи орто оскуолата), «Итэҕэтиилээх тыл» анал аат — «Утум» хамаанда («Көмүс саас» түмсүү), «Кэскиллээх тыл» анал аат — «Кэнчээри» хамаанда («Ёлочка» оҕо уһуйаана), «Алгыстаах тыл» анал аат — «Оһуор» хамаанда («Оһуор» Култуура киинэ), «Өркөн өй» анал аат — ЭРМЭК хамаандата, ”Хомоҕой тыл” анал аат — “Чэгиэн» хамаанда (участковай балыыһа), “Сайдам тыл” анал аат – олохтоох дьаһалта хамаандата. Кыайыылаахтарга бириистэр, туоһу суруктар туттарылыннылар. Төрүөбүт тылбыт сайдарын туһугар «Аман ас» түһүлгэни
төрүттэспит нэһилиэкпит тэрилтэлэригэр, дьүүллүүр сүбэҕэ барҕа махтал буолуохтун.
Сахалыы саҥа,
Саха үөрэҕэ
Салааланан сайдан
Сандааран таҕыстын!
Алампа
Людмила ПАВЛОВА- Саха тылын, литэрэтиирэтин учуутала
