Дьокуускай куоракка бу күннэргэ «Үрүҥ тугутчаан» диэн оҕо, ыччат ускуустубатын бэстибээлэ аан бастакытын ыытылла турар. Манна, Саха сирин араас муннуктарыттан оҕолор, салайааччылар мустан, бэйэлэрин талааннарын, дьоҕурдарын көрдөрө сылдьаллар. Бэстибээл киэҥ далааһыннаахтык куорат араас тэрилтэлэригэр биэс хайысхаҕа тарҕанан буола турар. Ол курдук, муусука, тыйаатыр, хореография, уруһуй, киинэ ускуустубалара уонна араас маастар-кылаастар, төгүрүк остуол о.д.а.
Бу бэстибээлгэ Бордоҥ орто оскуолатын иһинэн үлэлиир «Ситим» театральнай устуудьуйа оҕолоро ситиһиилээхтик кыттан II истиэпэннээх лауреатынан наҕараадаланнылар. Кинилэр, Бордоҥ оскуолатыгар өр кэмҥэ саха тылын уонна литературатын учууталынан үлэлээбит, элбэх пьесалары, номохтору, сценкалары суруйан хаалларбыт үтүөкэн киһи Николай Алексеев — Начын Сээн «Номох буолбут снайпер» 5 оонньуулаах айымньытынан кытыннылар. Бу айымньыга биһиги биир дойдулаахпыт, Аҕа дойду Улуу сэриитин кыттыылааҕа, снайпер Егор Константинович Петров туһунан сырдатыллыбыт. Салайааччылар этэллэринэн, оҕолорго бу айымньыны дириҥник тириэрдэр сыалтан испэктээги туруорбуттар. Бу айымньынан улуус иһигэр ыытыллар күрэстэргэ элбэхтэ кыттан тураллар. Ону тэҥэ, аны саас снайпер Егор Петров төрөөбүт-үөскээбит дойдутугар Куокунуга баран эмиэ көрдөрүөхтэрэ. Оҕолор бу айымньыны туруоран, оонньоон баран снайпер туһунан өссө элбэҕи биллилэр, хайдах биир эрэ атахтаах сылдьан сэриилэспитин туһунан сөҕөн, дьоруой аатын ааттатаары, хорсун быһыытын билиҥҥи кэм ыччаттарыгар тириэрдэллэр.
«Ситим» театральнай устуудьуйа 2020 сылтан тэриллэн күн бүгүҥҥэ диэри олус айымньылаахтак үлэлиир. Салайааччыларынан Бордоҥ орто оскуолатын иитэр үлэҕэ дириэктэри солбуйааччы Любовь Петрова уонна оскуола педагог-бибилэтиэкэрэ Анна Никитина иилээн-саҕалаан илдьэ сылдьаллар.
«Үрүҥ тугутчаан» бэстибээл экспердара «Номох буолбут снайпер» айымньыны олус биһирии көрдүлэр. Кыайыы 80 сылыгар олус үчүгэй туруоруу буолсу, — диэн өссө да кэлэр күрэстэргэ кытталларыгар ыҥырдылар.
Елизавета ТИТОВА