Күндү учууталлар, үөрэнээччилэр уонна төрөппүттэр!
Хас биирдиибитигэр дьоһун суолталаах Билии күнүнэн ис сүрэхпиттэн
эҕэрдэлиибин!
Бу күн сонун арыйыылары, билиини, кыахтары түстүүр саҥа үөрэх дьыла
саҕаламмытын кэрэһилиир. Биһиги оҕолорбутугар – бу үрдүгү дабайыы,
ситиһиилэр, оттон учууталларга – билиини бэлэхтиир, уопуту үллэстэр,
ситиһиигэ кынаттыыр, хас биирдии оҕо кыаҕын арыйар кэм.
Арассыыйаҕа Дьиэ кэргэн, оттон Саха сиригэр Оҕо саас сылыгар
өрөспүүбүлүкэбитигэр 15 тыһыынча оҕо оскуолаҕа бастакы кылааска үөрэнэ
киириэҕэ, Билии дойдутугар үктэнэн, саҥа кэрэ эйгэҕэ куустарыаҕа. Бу күн
аан бастаан оскуола аанын арыйан учууталларын, бииргэ үөрэнэр оҕолорун
кытта билсиһэн, олохторун тухары доҕордоһуулара саҕаланыаҕа.
Өрөспүүбүлүкэ бастакы кылааска киирэр оҕолоругар бэлэх быһыытынан икки
судаарыстыбаннай тылынан толоруллубут оскуолатааҕы күннүк
туттарыллыаҕа.
Үөһээ кылаас үөрэнээччилэригэр саҥа үөрэх дьыла –
саҥа үрдүк сыаллары туруорунан, ситиһэргэ дьулуһуу кэмэ. 11 кылааска үөрэнэр
9 тыһыынчаттан тахса үөрэнээччи эксээмэннэри ситиһиилээхтик туттарарга
саҥа үөрэх дьылын устатыгар дьаныардаахтык дьарыктаныаҕа. Быйыл биир
кэлим судаарыстыбаннай эксээмэни өрөспүүбүлүкэҕэ 7 000 тахса оскуоланы
бүтэрээччи туттарбыта, 23 оҕо 100 баалы ылан үрдүк көрдөрүүнү ситиспитэ.
В.П. Ларионов аатын сүгэр физико-техническэй лицейи бүтэрээччи Дмитрий
Алексеев нуучча тылын уонна математиканы 100-түү баалга туттарбыта.
Өрөспүүбүлүкэҕэ оҕону хаачыстыбалаахтык үөрэтии, иитии уонна
сайыннарыы инфраструктуратын тэрийиигэ дьоһун үлэ-хамнас ыытыллар.
Балаҕан ыйын 1 күнүгэр Дьокуускайдааҕы кадеттар оскуола-интэринээттэрэ,
оттон Кэбээйи улууһун Сайылык сэлиэнньэтигэр 275 миэстэлээх оскуола
саҥа дьиэлэрэ ааннарын үөрүүлээхтик арыйыахтара.
Быйылгы үөрэх дьылыгар үөрэнээччилэри интэриэһинэй уларыйыылар
күүтэллэр, үөрэх саҥа дьиссипилиинэлэрэ баар буолуохтара. Ол курдук,
«Технология» уруогар оҕолор инники олохторо ситиһиилээх буоларыгар
туһалаах саҥа сатабылга үөрэниэхтэрэ, бырагыраамалары оҥоруу, интернет
ситиминэн куттал суох буолуутун, аныгы сыыппара инструменнарын туһаныы
төрүттэрин үөрэтиэхтэрэ. Аныгы үйэҕэ патриотизм тыыныгар иитии, киһиэхэ
уонна судаарыстыбаҕа куттал суох буолуутун боппуруостара дьоһун
суолталаахтарынан сибээстээн «Төрөөбүт дойдуну көмүскээһин уонна куттал
суох буолуутун төрүттэрэ» дьиссипилиинэ киириэҕэ.
«Дьиэ кэргэн олоҕун төрүттэрэ» диэн – обургу оҕолору дьиэ кэргэҥҥэ сөптөөх
сыһыаны торумнуурга, бэйэ дьиэ кэргэнин ытыктыырга уонна таптыырга үөрэтэр
саҥа дьиссипилиинэ баар буолуоҕа. Саха сиригэр дьиэ кэргэн үгэс буолбут
сыаннастарын чөл хаалларыыга,
оҕолору уонна ыччаты өй-санаа, майгы-сигили өттүнэн иитиигэ элбэх
оҥоһуллар, ол чэрчитинэн 2024 сыл биһиэхэ Оҕо саас сылынан
биллэриллибитэ. Арассыыйаҕа дьиэ кэргэн үгэс буолбут сыаннастарын чөл
хаалларыы – дойду Бэрэсидьиэнэ Владимир Владимирович Путин бэлиэтээбит
национальнай тумус соруктарыттан биирдэстэринэн буолар. 2024 сыл
Дьиэ кэргэн сылынан биллэриллибитэ ону быһаччы бигэргэтэр.
Бүгүн учууталларбытыгар ураты махталбын тиэрдэбин – эһиги көннөрү
билиини биэрэр эрэ буолбатаххыт, оҕо киһи буолан тахсарыгар иитэр үлэни
ыытаҕыт, ыарахан түгэннэргэ өйүүгүт, ситиһиилэргэ кынаттыыгыт. Дьиҥэ,
биһиги уопсастыбабыт кэскилин түстүүгүт, инники олохпут акылаатын
уураҕыт. Эһиги үлэҕит тугунан да кэмнэммэт күндү. Торумнаабыт былааҥҥыт
барыта олоххо киирэригэр эһиэхэ санаа көтөҕүллүүтүн, эстибэт эрчими,
уҕараабат күүһү баҕарабын!
Күндү оҕолор, ыччаттар, бу сыл саҥа арыйыылары уонна умнуллубат
кэрэ түгэннэри бэлэхтээтин! Саҥа үрдэллэргэ дьулуһуҥ, толлубакка
ыйыталаһыҥ, саҥаны оҥорортон, холонортон куттанымаҥ.
Бырааһынньыгынан! Билии күүһэ ситиһиигэ тиэрдэр суолу сырдаттын!
Саха Өрөспүүбүлүкэтин Ил Дархана А.С. НИКОЛАЕВ