Ытыктабыллаах байыаннай
сулууспалаахтар, сэрии уонна байыаннай дьайыы
бэтэрээннэрэ, Арассыыйа
Федерациятын Сэбилэниилээх Күүстэрин саллааттара уонна эписиэрдэрэ!
Күндү Саха сирин олохтоохторо!
Эһигини Аҕа дойдуну көмүскээччи күнүнэн истиҥник эҕэрдэлиибин!
Бу биһиги дойдубут устуоруйатыгар ураты суолталаах күн, РФ норуота сөбүлүүр уонна ытыктыыр бырааһынньыга. Биһиги Арассыыйа байыаннайдарыгар бэриниилээх сулууспаларын иһин дириҥ ытыктабылбытын биллэрэбит.
Ханнык да ыарахан кэмҥэ Ийэ дойдуларын тутулуга суох буолуутун туһугар дьоруойдуу хорсун быһыыларынан, тулуурдарынан уонна сомоҕолоһууларынан аатырар буойуннарбыт улуу кыайыылара сүрэхпитигэр өрүү тыыннаах. Бу бырааһынньык төрдө – өстөөҕүн самнарбыт дойду норуотун сомоҕолоһуута. Саамай суостаах сэрии сылларыгар Арассыыйа норуоттара биир киһи курдук саа-саадах тутан, Ийэ дойдуларын көмүскэлигэр турбуттара. Бу Арассыыйа судаарыстыбата тэриллиэҕиттэн бүгүҥҥү күҥҥэ диэри хатыланар.
Ураты истиҥ тыллары бүгүн Аҕа Дойду Улуу сэриитин бэтэрээннэригэр аныыбыт. Биһиги аҕаларбыт уонна эһэлэрбит хорсун быһыылара Аан дойдуну нацизмтан, кулуттуу бас бэринииттэн быыһаабыта. Ол туһунан ытык өйдөбүл биһиги сүрэхпитигэр мэлдьи тыыннаах. Биһиги кыайыы көтөллөөх буойуннарбыт эдэр көлүөнэҕэ билигин да үтүө холобур буолаллар.
Бүгүн анал байыаннай дьайыы кэмигэр Саха Өрөспүүбүлүкэтиттэн төрүттээх Аҕа дойдуну көмүскээччилэр буойун уонна гражданин быһыытынан ытык иэстэрин чиэстээхтик толоролллор. Кинилэр Сэбилэниилээх Күүстэр байыаннайдарыгар уонна дойду олохтоохторугар сатабылларынан, тулуурдарынан, сомоҕолоһууларынан холобур буолаллар. Өрөспүүбүлүкэ уон икки буойуна Арассыыйа Федерациятын Дьоруойун үрдүк аатын ылбыттара, тыһыынчанан уолаттарбыт Арассыыйа судаарыстыбаннай наҕараадаларын туппуттара. Кинилэр биһиги киэн туттуубутунан уонна хорсун быһыы, дойдуга бэриниилээх буолуу холобурунан буолаллар. “Арассыыйаҕа Саха сириттэн, бука, аан дойдуга суох буойуннар кэлэллэр”, – диэн Арассыыйа Бэрэсидьиэнэ, Арассыыйа Федерациятын Сэбилэниилээх Күүстэрин Үрдүкү тутаах командующайа Владимир Путин этэн турардаах.
Арассыыйа Федерациятын Сэбилэниилээх Күүстэригэр көмөлөһөр уонна өйүүр туһугар дойду бүттүүнэ түмүстэ. Саха Өрөспүүбүлүкэтэ анал байыаннай дьайыы ыытыллар сиригэр тиэхиньикэ, тэрил ыытан, аадырыстаах көмө оҥорон, дойду эрэллээх тыылынан буолла. Өрөспүүбүлүкэҕэ аармыйаны уонна байыаннай сулууспалаахтар дьиэ кэргэннэрин өйүүр үтүө хамсааһын таҕыста. Арассыыйа байыаннайдарыгар уонна кинилэр дьиэ кэргэннэрин чилиэннэригэр болҕомтолоохтук уонна кыһамньылаахтык сыһыаннаһыахпыт.
Биһиги аҕаларбыт уонна эһэлэрбит хорсун быһыыларын өйдүү-саныы сылдьарбыт курдук, үүнэр көлүөнэ бүгүҥҥү хорсун-хоодуот буойуннарбыт дьоруойдуу быһыыларын ытыктыахтара, дойдуларын кыайыылаах устуоруйатын харыстыахтара.
Күндү Аҕа дойдуну көмүскээччилэр, байыаннай сулууспалаахтар дьиэ кэргэннэрэ, сэрии бэтэрээннэрэ, эһиэхэ кытаанах доруобуйаны, этэҥҥэ буолууну уонна дьоллоох олоҕу баҕарабын! Арассыыйа Федерациятын Сэбилэниилээх Күүстэригэр уруй-айхал! Кыайыы биһиэнэ буолуоҕа!
Айсен НИКОЛАЕВ,
Саха Өрөспүүбүлүкэтин Ил Дархана.