«Пушкинскай карта» диэн Судаарыстыбаннай бырагыраама 2021 сылтан сокуонунан ылыллан олоххо киирэн ситиһиилээхтик үлэлиир. Бу бырагыраама федеральнай бүддьүөттэн үбүлэнэр. Инньэ гынан, «Пушкинскай картанан» эдэр киһи култуура тэрээһиннэригэр, киинэлэргэ, түмэлгэ босхо сылдьар кыахтаах. Ол курдук, 14-тэн 22-гэр диэри саастаах ыччат «Пушкинскай картаны» оҥотторуон сөп. Сыл саҕаланыыта бу картаҕа харчы кэлэн түһэр, 2026 сылга «Пушкинскай карта» баланса 5 000 солк. тэҥнэһэр.
Бырагыраама үлэлиир кэмигэр (2021-2025 сс.) 22 мөлүйүөнтэн тахса кыттааччы, 90 мөлүйүөнтэн тахса култуура араас тэрээһиннэригэр сырытта. Ол аата ыччат дьон кэрэҕэ, искусствоҕа сыстар баҕалааҕын, улахан интэриэстээҕин көрдөрөр.
Картаны туттуу кэккэ ирдэбиллэрдээх, ол курдук:
– Бу картаҕа баар харчыны сыл бүтүөр диэри туттуохха наада, сатаан туттубат түгэҥҥэ тобоҕо кэлэр сылга көспөт.
– Бу сууматтан 2000 солк. диэри култуура Министиэристибэтэ эрэ бигэргэппит киинэлэригэр сылдьыахха сөп.
– Картанан бырагыраамаҕа эрэ кыттар култуура тэрээһиннэрин билиэтэ төлөнөр;
– Атын счеттарга харчы көһөрөр, билиэт сорҕотун тус үбүнэн төлүүр сатаммат;
– “Пушкинскай картанан” атыылаһыллыбыт тэрээһиҥҥэ киирэргэ пааспары бэрэбиэркэлиэхтэрин сөп.
– Картаны туттааччы 23 сааһын туолла да, “Пушкинскай карта” арахсар.
Бу картаны хайдах оҥотторобун? 14 сааһын туолбут оҕо пааспар оҥотторон баран «Госуслуги» порталга регистрацияланар. Салгыы “Госуслуги культура” сыһыарыы нөҥүө “Пушкинскай картатын” таһаарыытын бигэргэтэр. “Мир” виртуальнай картаны, эбэтэр “ВТБ” баҥҥа физическай (пластиковай) карта оҥотторуохха сөп.
Оҕо бэйэтэ сатаан регистрацияламмат түгэнигэр Л.Попов аатынан Сунтаардааҕы бибилэтиэкэҕэ тиийэн оҥотторуон сөп, эбэтэр оскуоланан коллективнай сайаапка биэрдэхтэринэ, үлэһиттэр оскуолаҕа тиийэн холбоон биэрэллэр.
Надежда Иванова, Сунтаар улууһун
култууратын уонна айылгытын исписэлииһэ.