“Бастыҥнар хамсааһыннара” уонна СӨ култууратын уонна духуобунай сайдыыга министиэристибэтин көҕүлээһининэн Дьокуускай к. “Үрүҥ тугутчаан” диэн үүнэн эрэр көлүөнэ урамньытын көрдөрөр бэстибээлигэр бу күннэргэ 1500 тахса кэриҥэ оҕо кытта сылдьар. Онтон тэрийээччилэр этэллэринэн сүүмэрдиир түһүмэххэ 4000-тан тахса оҕо кыттыбыт. Сунтаар улууһуттан бу бэстибээлгэ Сунтаардааҕы политехническай лиссиэй 7-с “в” кылааһын үөрэнээччилэрэ (кылаас салайааччыта Тихонова Я.Ф.) С.А.Зверев-Кыыл Уола туруорбут “Оһуор” үҥкүүтүнэн кытта сылдьаллар.
Оҕолор үҥкүүлэрин бу оскуола 11 кылааһын үөрэнээччитэ, “Түһүлгэ” НФК солистката Саина Болурова тус хайысхалаах бырайыагын чэрчитинэн үөрэппит. Оҕолор үҥкүүнү тутатына ылынан, үөрэтэн билигин Дьокуускай к. улахан түһүлгэтигэр дьоһуннаахтык туттан үҥкүүлээн көрдөрдүлэр. Биллэн турар, улуу киһибит айымньытын ыччат дьон үҥкүүлүү, тарҕата, үйэтитэ сылдьара хайҕабыллаах.
Динара Васильева, СПТЛИ 7-с “в” кылааһын үөрэнээччитэ: “ “Оһуор” үҥкүүнү биһиги кылаас 6-с кылааска сылдьан үөрэппиппит. Үҥкүүбүтүгэр анаан бары биир кэлим сахалыы таҥас тиктэрбиппит. Оскуолабытыгар араас тэрээһиннэргэ бу үҥкүүбүтүн толорооччубут. Онтон улууспутугар “Үрүҥ тугутчаан” сүүмэрдиир түһүмэҕин этэҥҥэ ааһаммыт Дьокуускай куоракка ыраах айаны айаннаан кэлбиппиттэн олуһун үөрдүбүт. Өрөспүүбүлүкэбит араас муннугуттан олус элбэх оҕо кытта кэлбит, бары олус бэлэмнээхтэр, дьоҕурдаахтар, талааннаахтар. Араас улуус оҕолорун кытта билистибит, доҕордостубут. Кылааһынан олус эйэлээхтик, көхтөөхтүк сылдьабыт”.
Онон Сунтаар улууһугар “Оһуор” үҥкүүнү эдэриттэн эмэнигэр тиийэ үҥкүүлүүллэр диэтэхпинэ сыыспатым буолуо.
Мира АФАНАСЬЕВА