Арассыыйа күнүгэр, дойдубутугар улахан бырааһынньык үгэнигэр, Сунтаардааҕы политехническэй лиссиэй-интэринээккэ үрдүк үөрүү тосхойдо. Бу кэскил кыһата, аныгы технологиялары баһылыыр, сатабыллаах ыччаты иитэн таһаарар үөрэхпит кыһата, Саха Өрөспүүбүлүкэтин Норуотун Учуутала, биир дойдулаахпыт Олег Константинович Сосин аатын сүктэ.
Бу — улахан чиэс, бу — үрдүк эппиэтинэс. Олег Константинович — аҥардас үөрэх тэрилтэтин салайааччыта эрэ буолбатах. Кини — норуотун дьиҥнээх тапталынан, муударай сүбэтинэн, үлэтинэн-хамнаһынан дьон-сэргэ махталын ылбыт улуу педагог.
Олег Константинович бу лиссиэйи төрүттээбитэ номнуо 35 сылын туолла. Бу — биир киһи олоҕор эрэ буолбакка, бүтүн көлүөнэ дьылҕатыгар анаммыт уһун, сыралаах айан. Бу сыллар устата кини оҕо аймаҕы кытта алтыһан, кинилэр талааннарын арыйан, олоххо бэлэмнээх дьон буолан тахсалларыгар олук уурда. Кини салайыытынан лиссиэйбит сайдан, кэҥээн, саҥа технологиялары баһылаан, Сахабыт сирин инники күөҥҥэ сылдьар кыһаларыттан биирдэстэрэ буолла.Махталбыт муҥура суох!
Биһиги, Сунтаар дьоно-сэргэтэ, бу үтүө түгэҥҥэ сүҥкэн кылааттарын киллэрбит, лиссиэйи тутууга, атаҕар туруорууга сыраларын биэрбит, сүүрбүт-көппүт бары дьоммутугар — учууталларга, төрөппүттэргэ, меценаттарга барҕа махталбытын тириэрдэбит. Эһиги баар буолаҥҥыт, эһиги дьулуургутунан бу кыһа үүннэ-сайынна.
Олег Константинович Сосин аата аныгы үйэ оҕолорун өйдөрүгэр-санааларыгар иҥиэҕэ. Кини сырдык ырата, олоххо киллэрбит баҕа санаата — оҕолорбут ситиһиилэрэ, кинилэр дойдуларыгар туһалаах дьон буолан тахсыылара — салҕанар. Бу күн биһиги бары биир сомоҕо буолан, инникигэ эрэллээхтик көрөбүт.
Уруй-айхал! Олег Константинович Сосин аатынан Сунтаардааҕы политехническэй лиссиэйгэ!
Сардаана АФАНАСЬЕВА