Аан дойдутааҕы дьиэ кэргэн күнүнэн Хоро нэһилиэгэр оскуола үөрэнээччилэрэ илиинэн оҥоһуктарын быыстапкатын туруордулар. Быыстапканы Хоро орто оскуолатыгар технология учууталынан үлэлиир, 50 сыл үөрэҕирии эйгэтигэр ыстаастаах, РФ норуотун үөрэҕириитин туйгуна Полина Петровна Герасимова көҕүлээһининэн тэрийдилэр.
Полина Петровна Хоро нэһилиэгин бочуоттаах олохтооҕо. Оскуолаҕа өр кэмҥэ дириэктэринэн онтон билигин технология учууталынан бэрт таһаарыылаахтык үлэлии сылдьар. Кини такайыытынан оскуола оҕолоро элбэххэ үөрэннилэр диэн олохтоохтор үөрэ-көтө кэпсииллэр. Бүгүҥҥү быыстапкаҕа төрөппүттэр оҕолоро оҥорбут үлэлэрин көрөн олус астыннылар, сөҕүү-махтайыы буоллулар. Учуутал хас биирдии үөрэнээччи талаанын сайыннарыыга кыһамньытын уурара оҕолор оҥоһуктара элбэҕиттэн көстөр. Оҕолор быыстапкаҕа технология уруогар араас оонньуурдары, киэргэллэри, хартыыналары, сахалыы олбоххо тиийэ оҥорбуттарын таһаарбыттар. Маннык айар үлэлэрин элбэх дьон көрүүтүгэр уурбуттарыттан бэйэлэрэ эмиэ үөрэн мичилиһэллэр.
Хоро далбардара бары кэриэтэ илиилэригэр талааннаахтар, сатабыллаахтар. Ол курдук, Сунтаар улууһун норуотун маастара Светлана Игнатьева салайыытынан араас киэргэллэри, симэхтэри ыһыахха анаан атыыга бэлэмнээтилэр.
Вера ИВАНОВА
