Кулун тутар – сааскы маҥнайгы ый, халлаан сылыйан, тула барыта сырдаан, кэрэтийэн көстөр үтүө күннэрэ үүннүлэр. Кэрэ сиргэ чугаһыыр күннэрин баттаһа үөрэнээччилэр, уһуйааччылар айар дьоҕурдарын көрөр, сыаналыыр, киэҥ эйгэҕэ таһаарар сыаллаах кулун тутар 19-24 күннэригэр улуустааҕы декоративнай-прикладной айар дьоҕурдарын дэкээдэтэ ыытыллыаҕа.
Дэкээдэ туһунан Н.М.Родионова аатынан Сунтаардааҕы оҕо дьоҕурун сайыннарар киин эбии үөрэхтээһин педагога Вера Зоммер маннык билиһиннэрэр:
— Сунтаардааҕы оҕо дьоҕурун сайыннарар киин муниципальнай тирэх киин биир улахан, долгутуулаах тэрээһининэн үөрэнээччилэр декоративнай-прикладной айар дьоҕурдарын дэкээдэтэ буолар. Улуус оскуолаларыгар балаһыанньалар тарҕаммыттара, дэкээдэни арыйар күүтүүлээх тэрээһининэн хас сылын аайы ситиһиилээхтик ыытыллар “Ай-Куо” эдэр модельердар күрэстэрэ Б.Н. Егоров аатынан Күндэйэ орто оскуолатыгар кулун тутар 19 күнүгэр ыытыллыаҕа. Бу күн күрэс ааптара, эбии үөрэхтээһин педагога, Мария Трофянова, оскуола кэлэктиибэ муода эриэккэс эйгэтин төрүттүөхтэрэ. Салгыы кулун тутар 20 күнүгэр А.П.Павлов аатынан Сунтаар 1-№дээх орто оскуолатыгар 5-8 кылаас үөрэнээччилэригэр «Швейная эстафета” буолуоҕа. Сорудах быһыытынан, 6 эдэр иистэнньэҥ, биир салайааччы бэриллибит бириэмэҕэ түргэнник, хаачыстыбалаахтык сиэптээх шоппер киэбин быһан, тигэн, киэргэтэн дьүүллүүр сүбэҕэ туттарыахтаах.
Дэкээдэ түмүгэр өрөспүүбүлүкэтээҕи «Радуга Севера” үөрэнээччилэр декоративнай-прикладной айар дьоҕурдарын быыстапкатын улуустааҕы түһүмэҕэ, «Кукломания» оҕолор айбыт куукулаларын күрэһэ, «Уран уустар түһүлгэлэрэ» уһуйааччылар айар дьоҕурдарын күрэһэ кулун тутар 24 күнүгэр Сунтаарга буолуоҕа. «Радуга Севера” быыстапкаҕа 25 араас көрүҥү, холобур мастан, муостан, хоруоҥкаттан, туойтан оҥоһуктары, тигии, баайы пэчворк, гильоширование о.д.а. үлэлэри дьүүллүүр сүбэ сыаналыаҕа уонна бастыҥтан бастыҥнар өрөспүүбүлүкэтээҕи быыстапкаҕа кыттыахтара.
Онон улуус тарбахтарыгар талааннаах, айар дьоҕурдаах үөрэнээччилэрин, уһуйааччыларын күрэстэргэ көхтөөхтүк кыттыҥ диэн ыҥырабыт.
Айна ЯКОВЛЕВА