Ыһыах сиэрэ-туома дириҥ силистээх-мутуктаах диэн мээнэҕэ этиллибэт. Былыр өбүгэлэрбит ыһыах ыһыллыан 3-7 эбэтэр 9 күн иннинэ хайаан да сүгүрүйүү сиэрин-туомун оҥороллоро. Ол сиэринэн бүгүн, ытык Ыгыатта сиригэр-уотугар сүдү киһибит, айылҕаттан айдарыылаах, саха омуга киэн туттар норуот ырыаһыта, добун тойуксута, Дархан оһуохайдьыта, саха үҥкүүтүн туруорааччы Сергей Сибиэрэп – Кыыл Уола өрөгөйдөөх 125 сылыгар анаммыт Сунтаар улууһун бүтүн өрөспүүбүлүкэтээҕи ыһыаҕар Сүгүрүйүү сиэрэ-туома ыытылынна.
Улуу киһибит төрөөн-үөскээн, уутуйан олорон ааспыт сиригэр улуус баһылыга Анатолий Григорьев, нэһилиэк бары баһылыктара, тэрийээччилэр, итиэннэ ыҥырыылаах ыалдьыттар тоҕуоруһа мустан Үрдүк Айыыларга сүгүрүйэн, көрдөһөн алгыс ыллылар.
СӨ култууратын туйгуна, СӨ Дархан этээччитэ, Аар Айыылартан айдарыылаах алгысчыт Михаил Евсеев – Кураһаай Мэхээлэ аал уоту оттон, алаадьынан айах тутан, кыынньар кымыһынан күндүлээн, халлаан 9 хаттыгаһыгар олорор сүдү Айыылартан көрдөстө, Улуу киһибит Сергей Сибиэрэп ытык маһыгар сүгүрүйдэ.
Салгыы кэлбит ыалдьыттар Кыыл Уола түмэл-уһаайбатын кэрэхсии көрдүлэр. Ол курдук, Түбэй Дьаархан ытык кырдьаҕастарын этиилэринэн, Сергей Сибиэрэп төрөөбүт алааһыттан, Бэдьээҥкэй Быһыттааҕыттан олорбут дьиэтин 1981 с. көһөрөн аҕалан Бүлүү Эбэ кытылын үрдүгэр туруорбуттар. Бу дьиэҕэ кини таҥаһа-саба, туттубут мала-сала кичэллээхтик хараллан тураллар. Маны сэргэ тиэргэн иһигэр 2000 с. тутуллубут баараҕай түмэл баар. Бу түмэл дьиэтин быйыл саҥардан, элбэх өрөмүөн үлэтин ыыппыттар. Ол курдук түннүктэригэр күн уотуттан хаххалыыр аныгылыы сабыылары иилэн, Дьокуускай куоракка уруһуй түһэртэрэн оҥорторбуттар. «Хас биирдии түннүккэ бииртэн-биир ураты ис хоһоонноох хартыыналар уруһуйдара киирбиттэр. Оттон бу сабыылары арыйдахха, бэйэтэ тыыннаах хартыына, дьыл түөрт кэмэ барыта көстөр”, – диэн С.А. Зверев-Кыыл Уолун аатынан холбоһуктаах түмэл салайааччыта Альбина Федорова кэпсиир.
Тиэргэн иһигэр бииртэн-биир саҥа тутуулар тутуллан, Сергей Сибиэрэп туһунан чахчылары кэпсиир маллар үгүстэр. Ол курдук, кини 100 сылыгар анаан оҥоһуллубут Улуу Москуба туһунан тойугар аналлаах Мэҥэ тааһа эмиэ бу тиэргэҥҥэ хараллан турар.
Бу курдук, тойук томтордоох, ырыалаах ыллыктаах Ыгыатта Эбэ Хотун ытык сиригэр кэлбит дьон өрө күлүмнээн ааспыт Улуу киһибит туһунан үгүһү билэн-көрөн, ураты тыыны иҥэринэн тарҕастылар.
Елизавета ТИТОВА