Сунтаар нэһилиэгин үлэһит дьоно, тэрилтэлэр күөх Маай, Үлэ, Саас бырааһынньыгын «Ыраас сэлиэнньэ олбуортан саҕаланар» диэн миитинтэн саҕалаатылар.
Ол курдук, сарсыардаттан Ленин болуоссатыгар үлэни өрө тутар дьон тоҕуоруһа муһуннулар. Улуус баһылыга Анатолий Григорьев, Сунтаар нэһилиэгин баһылыгын солбуйааччыта Семен Николаев уонна Сунтаар улууһун идэлээх сойуустарын координационнай сэбиэтин бэрэссэдээтэлэ Антонина Степанова бэйэлэрин эҕэрдэ тылларын эттилэр, үлэни уруйдаатылар. Тургурдун үлэ бырааһынньыга! — диэн туран Александра Яковлева оһуокай тылын таһаарда. Мустубут дьон төгүрүччү тураннар, илии илииттэн ылсаннар, атах тэпсэн, оргууй оһуокай оһуорун оройуттан туттулар. Ол кэннэ өрүү буоларын курдук күргүөмнээх үлэҕэ, субуотунньукка тарҕастылар.
Тэрилтэ дьоно бэйэлэрин тэлгэһэлэриттэн саҕалаан, нэһилиэк иһинээҕи уулуссалары, паамытынньыктары, болуоссаттары уонна сынньанар паарканы ыраастаатылар, өрөмүөннээтилэр. Чаҕылхай, сылаас күн туран, үлэлииргэ олус бэрт күн буолан биэрдэ. Бу курдук нэһилиэк ырааһырарын, тупсарын туһугар көхтөөх үлэ тэрилиннэ.
Елизавета ТИТОВА