Ахсынньы 7-8 күннэригэр С.А.Зверев-Кыыл-Уолун аатынан норуот айымньытын киинигэр аан бастакытын «Култуура эйгэтэ тыа сиригэр» диэн култуура эйгэтин үлэһиттэригэр аналлаах форум ыытылла турар. Бу форум көҕүлээччитинэн уонна ааптарынан Сунтаар улууһун култууратын айылгытын салалтатын информационнай-методическай киинин салайааччыта Галина Самойлова буолар. Тэрээһин чэрчитинэн С.В.Хон аатынан “Хоновскай ааҕыылар” диэн аан бастакы конференция, «Лучший менеджер» диэн тыа кулууптарын идэтийбит таһымнарын көрдөрөр күрэстэр, методическай былаһааккалар уонна быыстапкалар тэрилиннилэр.
«Лучший руководитель культурно-досугового учреждения» күрэх түмүгүнэн анал аат кыайыылаахтарынан буоллулар:
3-с миэстэ — Мария Барахова, Үөһээ Бүлүү улууһун, Оҥхой нэһилиэгин сынньалаҥ киинин салайааччыта, 2-с миэстэ хаһаайката — Альбина Платонова, Сунтаар улууһун, Кириэстээх нэһилиэгин «Саргы түһүлгэтэ» култуура киинин салайааччыта уонна 1-кы миэстэ хаһаайына — Леонид Саввинов, Сунтаар улууһун, Күндэйэ нэһилиэгин “Ил” култуура киинин салайааччыта буоллулар.
«Лучший художественный руководитель культурно-досугового учреждения», анал аат кыайыылаахтарынан буоллулар:
3-с миэстэ — Лия Васильева, Үөһээ Бүлүү улууһун, Хомустаах култуура киинин уус-уран салайааччыта,
2-с миэстэ Евгения Эверстова, Сунтаар улууһун, Кэмпэндээйи нэһилиэгин, «Сайдыы» култуурунай-спортивнай киинин уус-уран салайааччыта уонна 1-кы миэстэ — Мария Спиридонова, Сунтаар улууһун, Бордоҥ нэһилиэгин «Айыллаан» култуура киинин уус-уран салайааччыта буолла.
«Лучший руководитель клубного формирования» анал аат кыайыылаахтарынан буоллулар:
Үһүс миэстэ Туйаара Алексеева, С.А.Зверев-Кыыл Уолун аатынан УНАК исписэлииһэ, иккис миэстэ Владислав Иванов, Бүлүү улууһун, Тылгыны нэһилиэгин “Түһүлгэ” сынньалаҥ киинин исписэлииһэ, бастакы миэстэ Виктория Мойтохонова, “Партизан” норуот театральнай киинин хормейстера.
“Лучший методист” ааты ыллылар: 3-с миэстэ – Эльвира Корякина, Бүлүү улууһун култууратын уонна норуот айымньытын сайыннарар улуустааҕы киин информационнай-методическай салаатын исписэлииһэ, 2-с миэстэ — Иван Захаров, Уус Алдан улууһун, Күлүмнүүр аатынан “Тойон Мүрү”култууратын дыбарыаһын информационнай-методическай салаатын сэбиэдиссэйэ, 1-кы миэстэ-Гаянэ Петрова, Амма нэһилиэгин, Федот Потапов аатынан норуот айымньытын дьиэтин үлэһитэ.
Маны сэргэ, бу кэннэ Галина Афанасьевна олус истиҥ, айар бенефис киэһэтэ буолла. Бу киэһэ Галина айар үлэтиттэн, олоҕуттан дьүһүйүүлэри ааҕан иһитиннэрдэ. Уонна киниэхэ култуура эйгэтигэр өр сыллаах таһаарыылаах үлэтин, Саха сирин култууратын сайдыытыгар сүҥкэн кылаатын иһин Саха өрөспүүбүлүкэтин култууратын үтүөлээх үлэһитэ бочуоттаах аат иҥэрилиннэ.
Алена ИВАНОВА