Бүгүн, балаҕан ыйын 19 күнүгэр, улууспутугар «Кросс нации-2025» Бүтүн Арассыыйатааҕы сүүрүү күнэ бэрт сэргэхтик ыытылынна. Дойду үрдүнэн ыытыллар улахан тэрээһин, 2004 сылтан саҕалаан нэһилиэнньэни физическэй култуураҕа уонна спортка сыһыарар, чөл олоҕу киэҥник тарҕатар сыаллаах тэриллэр. Манна оскуола үөрэнээччилэриттэн саҕалаан аҕам саастаах дьоҥҥо тиийэ көхтөөх кыттыыны ыллылар.
Ол курдук күммүт туран биэрэн, сүүрүүгэ бэйэтин холонон көрүөн баҕалаахтар элбэх буолан, тэрээһин олус тыҥааһыннаахтык, интэриэһинэйдик саҕаланна. Күрэхтэһии үөрүүлээх аһыллыытыгар улуус баһылыгын 1-кы солбуйааччыта Павел Григорьев, улуустааҕы спорт отделын салайааччыта Дьулустан Егоров уонна күрэхтэһии кылаабынай судьуйата Михаил Слюсарь бэйэлэрин эҕэрдэ тылларын эттилэр. Ону тэҥэ, бу тэрээһиҥҥэ ГТО нуорматын кыһыл, үрүҥ көмүс мэтээлгэ туттарбыт дьону чиэстээтилэр.
Маассабай сүүрүүнү таптааччыларга Ленин болуоссатыттан саҕалаан старт бэрилиннэ. Кинилэр уопсайа 7 бөлөххө саастарынан арахсан инникигэ эрллээх, күүстэрин-кыахтарын холонон сүүрдүлэр.
Владимир Степанов, кыттааччы: — Бэйэбин тургутан көрөөрү быйыл саҥа бастакыбын «Кросс нации» тэрээһинигэр сүүрэбин. Спорду олус сэҥээрэбин. Сүүрүүнэн дьаныардаахтык дьарыктанабын. Кыра да буоллар син ситиһиилээхпин. Холобур, “Маччаҕа бөҕө” күрэскэ 400 м. сүүрэн 2-с миэстэни ылан турардаахпын.
Валера Константинов, кыттааччы: — Былырыын буолбут «Кросс нации» 1,5 м. дистанцияҕа сүүрэн биэтэккэ бастакы кэлбитим. Быйыл иккис төгүлүн кытта кэллим. Оҕо сылдьан 2-с кылаастан сүүрүү көрүҥүн сөбүлээн дьарыктанар этим. Өрөспүүбүлүкэ, эригийиэн таһымыгар чемпион үрдүк аатын ыла сылдьыбытым.
Сүүрүү түмүгүнэн кыайыылаахтар уонна призердар өйдөбүнньүк мэтээлинэн, грамотанан уонна кубогынан наҕараадаланнылар.
Елизавета ТИТОВА