Бүгүн, Сунтаар нэһилиэгэр бүтүн Арассыыйатыыҕы чөл олоҕу көҕүлүүр “Кросс нации” маассабай сүүрүү аахсыйата ыытылынна. Манна сааһыттан тутулуга суох ким баҕалаах кытынна. Оскуола оҕотуттан аҕам саастаах дьоҥҥо тиийэ бары маассабай успуорду өрө туттулар. Сунтаар киинигэр турар атыы-эргиэн дьиэтин таһыттан “Алмаз” стадиоҥҥа диэри саастарынан бөлөххө арахсан тохтообокко сүүрдүлэр. Улуус, тэрилтэ салайааччылара бэйэлэрин холобурдарынан дьону чөл олоххо көҕүлээн бэйэлэрэ эмиэ сүүрүүгэ холоннулар.
Сүүрүү түмүгүнэн бэйэлэрин категорияларыгар кыайыылаахтар уонна призердар өйдөбүнньүк мэтээлинэн, грамотанан наҕараадаланнылар. Түмүккэ, дьиэ кэргэнинэн эстафетаҕа кытыннылар.
Мира АФАНАСЬЕВА
