Ыам ыйын 2-3 күнүгэр Санкт-Петербург куоракка «ДЕТалька 2025» робототехникаҕа оҕолорго норуоттар икки ардыларынааҕы күрэскэ Сунтаар уһуйаанын иитиллээччилэрэ кытыннылар. Күрэскэ Арассыыйа араас муннугуттан 300-чэкэ оҕо кыттыыны ылла. Аҥардас Саха сириттэн 16 уһуйаан тиийэн бырайыактарын көмүскээтилэр.
Сунтаар улууһуттан 3№-дээх «Чебурашка» оҕо сайдар кииниттэн бэлэмнэнии бөлөх иитиллээччилэрэ Злата Павлова уонна Алена Тимофеева «Аквабот» хамаанда кыттыыны ылла.
Эдэр робототехниктар 10-тан тахса киһилээх дьүүллүүр сүбэ иннигэр аквапаарка, бассейн ыраастыыр пылесос оҥорбут бырайыактарын кэпсээтилэр.
Оҕолор нууччалыы иҥнибэккэ, доргуччу саҥаран ыйытыыларга хоруйдаһан истилэр. Кыргыттар сахалыы таҥныбыттара, оҕуруо-киэргэл симэммиттэрэ олус сиэдэрэйдик көһүннэ.
Дьүүллүүр сүбэ оҕолор бырайыактарыгар сахалыы тыыны киллэрбиттэрин көрөн сөхтүлэр, олус сэҥээрдилэр. Ону тэҥэ, бырайыактарынан көрөөччүлэр интэриэстэрин тартылар.
Түмүккэ, Злата уонна Алена бырайыактара «ДЕТалька 2025» күрэскэ «Лучший инновационный проект» номинация кыайыылааҕа буолан кубогынан, дипломунан, хайҕал суругунан наҕараадаланнылар.
Санатан эттэххэ, бу иннигэр саас Ньурба куоратыгар ыытыллыбыт региональнай этапка бу бырайыактарынан 2 миэстэ буоланнар Санкт-Петербург куоракка ыҥырыллыбыттара. Аны кыргыттар атырдьах ыйыгар Кореяҕа барар буоллулар.
Маннык улахан ситиһии кэлэрин туһугар кылааттарын киллэрэн үлэлэспит, күүс-көмө, өйөбүл буолбут уһуйааммыт үлэһиттэригэр, чуолаан иитээччилэрбитигэр Анна Николаевнаҕа, Любовь Гаврильевнаҕа, Любовь Юрьевнаҕа барҕа махталбытын тириэрдэбит!
Майя Павлова, Любовь Еремеева