Алтынньы 8-11 күннэригэр Москва куоракка «Көмүс күһүн» агропромышленнай быыстапка 26-с төгүлүн ыытылынна. Манна Саха сириттэн 100-тэн тахса агропромышленнай тэрилтэ кытынна диэн суруйаллар. Ол иһигэр биһиги улууспутуттан Арыылаах нэһилиэгэр таһаарыылаахтык үлэлиир Римма Семенова салайааччылаах «Благо-8» бэйэ бородууксуйатын оҥорон таһаарар кээпэрэтиибэ.
Дойду агробырамыысыланнай комплексын ситиһиилэрин көрдөрөр Арассыыйа саамай бөдөҥ быыстапкатыгар «благолар» 82,5 бырыһыаннаах ынах арыылара үрдүк сыанабылы ылла. Ол курдук, «Традиционное» арыы кыһыл көмүс мэтээлинэн бэлиэтэннэ.
Наҕарааданы кээпэрэтиип бэрэссэдээтэлэ Римма Семенова тутта.
Санатан эттэххэ, былырыын эмиэ бу маннык арыылара 3-с миэстэни ылан турардаах. Бу бэйэбит оҥорор таһаарар бородууксуйабыт сылтан сыл тупсан иһэрин кэрэһитэ буолар.
Яина ВЛАСЬЕВА