Ыччат дьыалатыгар федеральнай агенство тэрийиитинэн, Бүтүн Арассыыйа үрдүнэн сыл ахсын ыччаттарга куонкурус биллэриллэн ыытыллар. Манна 18 сааһыттан 35-гэр диэри саастаах эдэр дьон кытталлар.
Ол курдук, быйылгы Арассыйатааҕы куонкуруска Трофим Иванов салайааччылаах ыччат отдела бу куонкуруска туризмы сайыннарыыга туһааннаах бырайыактара кыайыылаах буолан, 499 764 солк. Грант ылла.
Санатар этэр буоллахха, «ТурСун» улуустааҕы ыччат отделын авторскай бырайыгын олоххо киллэрэн, 2022 сыллаахха аан бастаан улуус ыччата бары нэһилиэктэртэн киирэн сүрдээх үчүгэй тэрээһини ыыппыттара.
Бастакы сүлүөт кэнниттэн бу тэрээһини өссө кэҥэтэн, өрөспүүбүлүкэ ыччатын мунньан тэрийдэхпитинэ хайдах буолуой диэн санааттан улуустааҕы ыччат бэлиитикэтин отдела СӨ ыччат дьылатын уонна социальнай алтыһыытын миниистиригэр этиилээх киирбиттэрэ. Эдэр дьон этиитин өйөөн, улууспутугар 2023 сыллаахха бастакы өрөспүүбүлүкэтээҕи ыччат сүлүөтэ Кэмпэндээйигэ ыытыллыбыта. Манна 400-тэн тахса ыччат өрөспүүбүлүкэ үгүс улууһуттан кэлэн кыттыбыттара, күрэхтэһии арааһа ыытыллыбыта, үлэҕэ-хамнаска сыһыаннаах элбэх этиилэр киирбиттэрэ, бырайыактар тобуллубуттара.
Оттон былырыын тохтоон баран, быйыл эмиэ тэрийэр санаалаахтарын туһунан улуус ыччатын лиидэрэ Трофим Иванов иһитиннэрдэ.
Граннарын үбэ «ТурСун» ыччат туристическай тэрээһинэ өссө сайдарыгар, кэҥииригэр төһүү буолуоҕа.
Яина ВЛАСЬЕВА