Атырдьах ыйын 21-23 күннэригэр Үөһээ Бүүлүүгэ – Олоҥхо ыһыаҕа ыытыллыбыт, айылҕа маанылаан анаабыт Түгэхтэй алааһыгар Саха Сирин оскуолаларын 1975 -1996 сс. выпускниктарыгар III төгүлүн спортивнай-култуурнай бэстибээл ыытылынна. Маннык бэстибээл 2024 с. Нам улууһугар аан маҥнайгытын ыытыллыбыта. Оттон 2025 с. Чурапчыга иккис төгүлүн тэриллибитэ.
Үс күн устата өрөспүүбүлүкэ бары улуустарыттан 1000-тан тахса киһи кэлэн, уопсайа 22 выпуск култуура уонна спорт көрүҥнэригэр кыттыыны ыллылар.
Screenshot
“Бэйэм 1989 с. выпуск туһунан этэр эбит буоллахха, бу иннинээҕи бэстибээллэргэ миэстэлэһэ илик этибит. Быйыл выпуск лиидэрэ Валентина Протодьяконова көмөлөһөөччүтүнээн Христина Сидоровалыын күүстээх үлэни ыытан, түмсүүлэри тэрийэн, ким туохха дьоҕурдааҕын уонна спортка ситиһиилэрин көрөн, ким ханнык көрүҥҥэ кыттарын быһаарбыттара. Онон бэйэбит 3 бөлөхпүтүгэр 4 көрүҥҥэ ситиһиилэннибит. Ол курдук, волейболга эр дьон уонна дьахталлар 1-кы миэстэ, буулдьанан ытыыга уонна ырыаҕа дьахталлар 1-кы миэстэ, 2-с көрүҥҥэ мин эстафетаҕа 2-с м. буоллум. Ону тэҥэ, үҥкүү күрэҕэр 1-кы миэстэ, дартска 3 миэстэ уонна корнхолга 4 миэстэ буолан, барыта 15 очукуолаах улахан арыттаах кыайыыны ситистибит. Буулдьанан ытыыга 1989 с. хамаандаҕа 4 кыттааччы баарыттан 3-һэ Дьаархан бэргэн ытааччылара киирдилэр. Сунтаар улууһуттан араас сылларга бүтэрбит выпускниктар көхтөөх кыттыыны ыллылар. Бэстибээлгэ салгын саатынан ытыыга 1989 сыллаах выпуск эппиэтинэһи сүгэн, тэрийэн ыыттыбыт. Күрэх кылаабынай судьуйатынан өрөспүүбүлүкэҕэ бастакы категориялаах судьуйа Александр Захаров, кини көмөлөһөөччүтүнэн – мин үһүс категориялаах судьуйа уонна күрэх сэкирэтээринэн Саргылаана Павлова үлэлээтибит”, – диэн бэстибээл кыттыылааҕа Павел Кырелов үллэстэр.
Саха сирин улуустарын бары выпусктарын түмэр сыаллаах бэстибээл аны Амма улууһугар ыытыллара былааннанар.
Елизавета ТИТОВА