Уулуссаҕа босхо сылдьар ыттар кыһалҕаларын быһаарыыга олохтоохтор бүттүүн үлэлэһиэхпитин наада. Манна олохтоох дьаһалта өттүттэн СӨ Бырабыыталыстыбатын «Дьиэ кыылларын Саха Өрөспүүбүлүкэтин территориятыгар тутуу» 237 N-дээх (01.08.2014) с. уонна 543 №-дээх (30.08.2022) с. уларыйыытын дьаһалыгар олоҕуран Сунтаар нэһилиэгин территориятыгар сэтинньи маҥнайгы күнүттэн саҕалаан ахсынньы 1 күнүгэр диэри анал рейдэ ыытылла турар.
Бу рейдэҕэ бэтэринээринэй сулууспа управлениетын, Сунтаардааҕы Ис дьыала отделын уонна олохтоох дьаһалтата исписэлиистэрэ сылдьаллар. Рейдэҕэ дьиэ кыылларын иитии быраабылатын кэһиини бэрэбиэркэлииллэр. Манан сиэттэрэн, сэтинньи 20 күнүттэн ахсынньы 1 күнүгэр диэри Сунтаар нэһилиэгин олохтоохторо кэһиллии баарын биллэхтэринэ 841135-22-1-03 нүөмэргэ эрийиэхтэрин сөп. Кутталы үөскэтэр, босхо сылдьар ытырыык ыттаах ыаллары быһаарыыга уонна хаһаайыттары кытта кыһалҕаны туоратарга анаан олохтоохтортон киирбит үҥсүүлэринэн тустаах сулууспалар үлэлэһиэхтэрэ.
Хаһаайыттар ыттаргытын көрүҥ, баайыҥ, эппиэтинэстээх буолары умнумаҥ.
Сунтаар сонуннара хаһыат