Быйыл, бүгүҥҥү күн туругунан, улуустааҕы нэһилиэнньэ дьарыктаах буолуу киинигэр 67 киһи үлэ көрдөөччү уонна үлэтэ суох дьон учуокка турдулар. Олортон 37 киһи сөптөөх үлэни булан учуоттан уһулунна. Сүнньүнэн бэйэ дьыалатын арынан, буҕаалтыр,атыыһыт курдуктарга киирдилэр.
Сайыҥҥы кэмҥэ оскуола оҕото дьарыктаах буолуутун хааччыйар сыалтан өрөспүүбүлүкэттэн 747989,84 солк. субсидия көрүллэн турар. Онно нэһилиэк дьаһалталарын кытта дьарыктаах буолуу киинэ сөбүлэһии түһэрсэн оҕолору үлэлэтиэхтээхпит.
Бүгүҥҥү күҥҥэ 10 нэһилиэктэн сайаапка киирэн турар. Маны таһынан улуус бүддьүөттүттэн 1 мөл. солк. харчы эмиэ сайыҥҥы кэмҥэ оҕону үлэлэтиигэ түһүөхтээх. Бу харчы агрооскуолаларга үлэлиир лааҕырдарга барыахтаах, – диэн Сунтаардааҕы дьарыктаах буолуу киинин салайаччыта Борис Уларов иһитиннэрдэ.
Санатан эттэххэ, быйыл Арассыыйа бэрэсидьиэнэ Владимир Путин көҕүлээһининэн «Каадырдар» диэн национальнай бырайыак үлэлээн саҕалаата.
Дмитрий ЫМЫЧАНОВ