Бу бэлиэ күнү аан дойдуга ыарыһахтары уонна бааһырбыттары көрүүнү-харайыыны төрдүттэн уларыппыт Британия уопсастыбаннай диэйэтэлэ Флоренс Найтингейл төрөөбүт күнүгэр сөп түбэһиннэрбиттэрэ. Оттон Арассыыйаҕа 1993 сылтан бэлиэтиир буолбуттара.
Дьон-сэргэ доруобуйата туруктаах буоларыгар мэдиссиинэ орто сүһүөҕүн үлэһиттэрэ сүрүн оруолу ылаллар. Ол курдук үрүҥ халааттаах сиэстэрэлэр быраас ыйыытынан-кэрдиитинэн күннэри-түүннэри ыарыһах дьон туругун кэтээн көрөллөр-истэллэр, кыһамньыларын ууран туран эмтииллэр. Быһатан эттэххэ, быраас уҥа илиитэ – кинилэр буолаллар.
Сунтаардааҕы киин балыыһа үрдүк категориялаах учаастактааҕы сиэстэрэтэ Наталия Самуиловна Черепанова бу эйгэҕэ үлэлээбитэ 45 сыла. Кини 8-с кылаас кэннэ Дьокуускайдааҕы мэдиссиинэ училищатыгар туттарсан фельдшер идэтин баһылаабыта. Үөрэҕин бүтэрэн баран 1981 с. Сунтаардааҕы балыыһа инфекционнай отделениетыгар сиэстэрэнэн үлэтин саҕалаабыта. Оччолорго, билиҥҥи курдук, мэдиссиинэ толору сайда илик буолан үлэлииргэ кэккэ ыарахаттары билэн ааспыттара. Ол курдук реанимация отделениета суох буолан ыарахан туруктаах ыарыһахтары аҥаар кырыытыттан бэйэлэрэ көрөн-харайан эмтииллэрэ. Ону тэҥэ «гепатит ыарыы олус элбэх этэ”, – диэн Наталия Самуиловна үлэлээбит бастакы сылларын ахтан-санаан ааһар. Сыралаах үлэтэ сыаналанан «СӨ доруобуйа харыстабылын туйгуна”, ону тэҥэ «Сунтаар улууһугар доруобуйа харыстабыла сайдарыгар кылаатын иһин» үрдүк бэлиэлэр хаһаайката буолбута.
-
Үөрүөх иһин, билиҥҥи ыччат урукку курдук үөрэхтэрин наһаа быраҕа сатаабакка, тиһэҕэр диэри үөрэнэн идэлэрин баһылыыллар диэн бэлиэтии көрөбүн. Мэдиссиинискэй сиэстэрэ идэтэ дириҥ билиини, үөрүйэҕи уонна сатабылы эрэйэр буолан 5 сыл буола-буола квалификацияны үрдэтии циклын ааһабыт. Саҥа үөрэхтэрин бүтэрбит эдэр исписэлиистэргэ идэҕитигэр бэриниилээх буолууну уонна тулууру баҕарабын. Эһиги үтүө санааҕытыттан, кыһамньыгытыттан эмтэнээччи туруга олус тутулуктанар.
Бу курдук улууспутугар доруобуйа харыстабылын сайдыытыгар сүҥкэн кылааты киллэрэ сылдьар үрүҥ халааттаах сиэстэрэлэбитин идэлээх күннэринэн итиитик-истиҥник эҕэрдэлиибит, махтанабыт. Үлэҕитигэр ситиһиини, доруобуйаны баҕарабыт!
Елизавета ТИТОВА