Бэс ыйын 11 күнүгэр Сунтаар улууһун дьокутааттарын Сэбиэтин XXIII ыҥырыылаах мунньаҕа буолла. Сессияҕа 8 боппуруос көрүлүннэ. Ол иһигэр 2025 сыллааҕы бүддьүөт туолуута, 2026 сыллааҕы бүддьүөккэ уларыйыылар, сиргэ уонна муниципальнай сулууспалаахтарга туһааннаах Балаһыанньалар көрүлүннүлэр. Дьокутааттар бүддьүөт уустугун бэлиэтээн элбэх боппуруостары туруордулар уонна инникитин ороскуот өттүгэр (сиһилии) ыраҥалааһын (анализ) ыытан дьүүллээһиҥҥэ таһаарары бэлиэтээтилэр. Маны таһынан, улуус икки оскуолатыгар: Сунтаар политехническай лиссиэй-интэринээтигэр Олег Константинович Сосин, Сунтаар үһүс нүөмэрдээх оскуолатыгар Иванов Климент Егорович ааттарын иҥэрэргэ сөбүлэҥнэрин биэрдилэр. Сунтаар улууһа 225 сылынан, Сунтаар улууһун Бочуоттаах олохтооҕун иҥэрии туһунан балаһыанньаҕа олоҕуран, дьокутааттар 9 киһиэхэ: Винокуров Валерий Константиновичка, Гаврилов Владимир Саввичка, Максимов Игорь Дмитриевичка, Пустолякова Людмила Николаевнаҕа, Кириллин Михаил Спиридоновичка, Данилов Пантелеймон Дмитриевичка, Дьячковская Валентина Григорьевнаҕа, Михайлова Ирина Ильиничнаҕа, Ноговицын Александр Анатольевичка Сунтаар улууһун Бочуоттаах олохтооҕо ааты иҥэрдилэр. Улууспут сайдыытыгар сүҥкэн кылааттарын киллэрбит тумус туттар дьоннорбутун эҕэрдэлиибит.
Наталья ЯКОВЛЕВА