Улуу Кыайыыга анаммыт пааматынньыктар сокуонунан харысхаллаахтар. Ол курдук, мэҥэ бэлиэлэри соруйан, күлүгэнниир санааттан алдьаттахха, киртиттэххэ, буортулаатахха холуобунай эппиэтинэскэ тардыллаҕын. Ол курдук, РФ Х.К.214ыст. 1ч. вандализмынан 3 ыйга болдьохтоох эбэтэр бөлөҕүнэн сылдьан буруйу оҥордоххо 3 сылга диэри көҥүл быстыан сөп. Онтон Аҕа дойду Улуу сэриитин кыттыылаахтарыгар анаммыт мэҥэ бэлиэлэри, стелалары, обелисктары, байыаннай көмүүлэри урусхаллааһын РФ Х.К.243.4ыст.2ч. буруйдааҕы уһаабыта 5 сылга диэри хаайыыга утаарыллар. Ону тэҥэ, Арассыыйа бэлиэ күннэрин, сэрии кыттыылаахтарын албан ааттарын аһаҕастык убаастаабат буолууну көрдөрдөххө нацизымы тилиннэрии (реабилитация нацизма) диэнинэн РФ Х.К.354.1 ыст. 3ч. олоҕуран 3 сылга диэри көҥүл быстыан сөп. Онон үйэлээх өйдөбүнньүктэри, история кэрэһитэ буолбут бэлиэлэри алдьаппакка, урусхаллаабакка төттөрүтүн харыстыыр, сөргүтэр, чөлүгэр түһэрэр ытык иэспит буоларын умнуо суохха.
Мира АФАНАСЬЕВА