Бу күннэргэ СӨ историктарын уонна кыраайы үөрэтээччилэрин Сойууһа тэрийэр учуонай-историктар лекторскай бөлөхтөрө Сунтаарга дьону-сэргэни, оскуола үөрэнээччилэрин кытта көрсүһүүлэри олохтуур. Сүрүннээн лектордар Саха сирин историятыгар аналлаах иһитиннэриилэри оҥороллор. Бөлөххө историческай наука кандидата, биллэр кыраайы үөрэтээччи Пантелеймон Петров, историческай наука кандидата, ХИФУ историческай факультет доцена Айтал Яковлев, историческай наука кандидата Ванда Игнатьева бааллар. Биир дойдулаахпыт Пантелеймон Петров «Сунтаар улууһа 17-18 үйэлэргэ», «Саха литературатын суругунан культуратын төрүттээччи Афанасий Уваровскай 225 сылыгар», «Дьокуускай куорат 400 сылыгар» аналлаах үлэлэринэн сырдатыы оҥоруоҕа.
Эдэр учуонай Айтал Яковлев сүрүннээн ыччат дьону кытта көрсүөҕэ. Билиҥҥи глобализация үйэтигэр сахалар бэйэбитин сүтэрбэккэ хайдах хааларбытын ырытар үлэлэрдээх учуонай буолар. Ону тэҥэ, куйаар ситиминэн чинчийиилэрин, санааларын үллэстэн тарҕатар устуулара элбэх сэҥэриини ылаллар, мөккүөрү таһаараллар. Бу сырыыга оскуола үөрэнээччилэригэр сайдыыны хайдах ылыныахтаахпытый? — диэн бэрт сэргэх кэпсэтиини олохтуоҕа.
Ол курдук учуонайдай бөлөхтөрө Тойбохойго, Сунтаарга, Элгээйигэ дьону, уопсастыбаннаһы кытта көрсүөхтэрэ, иһитиннэриилэри оҥоруохтара. Маны таһынан, Сунтаар кыраайы үөрэтээччилэригэр үлэлэригэр кэккэ сүбэлэри биэрдилэр. Ону тэҥэ, сарсын сахалартан бастакы ыраахтааҕыга айаннаан тиийбит «Маһары Баһыакап» диэн киинэ премьера иннинээҕи көрдөрүүтэ лиссиэй оҕолоругар ыытыллыаҕа.
Мира АФАНАСЬЕВА