Билэрбит курдук, улууспутугар национальнай бырайыактарынан, федеральнай бырагыраамаларынан элбэх социальнай эбийиэктэр тутулла тураллар. Ааспыт сылга үлэҕэ киирбит да тутуулар элбэхтэр. Онон, ханна тутуу барар – онно сайдыы диэн этии оруннаах.
«Үөрэҕирии» национальнай бырайыагынан улууспутугар саамай престижнэй үөрэх кыһата – политехническай лиссиэй тутуута былырыыҥҥыттан саҕаламмыта. Быйыл бу тутуу бастакы уочарата бүтэрэ былааҥҥа баар. Оттон Кириэстээххэ «Култуура» национальнай бырайыагынан тутуута саҕаламмыт эбийиэгинэн култуура киинэ буолар. Маны сэргэ Кэмпэндээйигэ «Олорор дьиэ уонна куорат эйгэтэ» национальнай бырайыагынан 33 кыбартыыралаах дьиэ тутуула турар. Бу улуус кыра нэһилиэгэр олус сүрдээх улахан тутуу буолар. Манна эдэр ыал, саҥа үлэлии кэлэр исписэлиистэр олохсуйдахтарына нэһилиэккэ үлэ-хамнас өссө күүскэ барыа, сайдыы да баар буолуо турдаҕа.
Улууспут киинигэр Өтөөкүгэ саҥа микрооройуон баар буолуоҕа. Манна билигин олоххо-дьаһахха аналлаах инфраструктурата оҥоһулла, тутулла турар.
Бүгүн, кулун тутар 25 күнүгэр, улууспутугар СӨ тутууга миниистирэ Виктор Романов биһиги улууспутугар кэлэн үлэлии сылдьар. Тутуу миниистирэ улуус салалтатын, тустаах тэрилтэ салайааччыларын кытары эбийиэктэри көрдө-иһиттэ, үлэни-хамнаһы билистэ, үлэһиттэри кытары кэпсэттэ. Ону сэргэ улуус дьаһалтатын, тутуу управлениетын үлэһиттэрин кытары быйыл ыытыллыахтаах үлэлэргэ тохтоон, санаатын үллэһиннэ, салайааччылар санааларын-оноолорун билистэ.
Яина ВЛАСЬЕВА
Улуус баһылыгын көмөлөһөөччүтэ Владимир Сидоров хаартыскаҕа түһэриилэрэ