Бүгүн Тойбохой нэһилиэгэр бурдугу куурдар ыскылаат үөрүүлээх аһыллыыта буолла. Маннык аныгылыы, баараҕай тэриллээх ыскылааты «Тойбохой» ТХПК улууска биир бастакынан тутан үлэҕэ киллэрдэ.
Үөрүүлээх тэрээһиҥҥэ СӨ тыатын хаһаайыстыбатын уонна ас-үөл бэлиитикэтин миниистирин бастакы солбуйааччыта Анна Стручкова, улуус баһылыга Анатолий Григорьев, улуустааҕы тыа хаһаайыстыбатын салалтатын салайааччыта Владимир Анисимов кыттыыны ыллылар.
Урукку бааһыналары сөргүтэн, сүөһү эбии аһылыгын бэйэ күүһүнэн оҥорон таһаарыы тыа хаһаайыстыбатын биир үйэлээх уонна көдьүүстээх салаата буолар. Ол да иһин, олохтоох уолаттар Алексей Сидоров, Александр Егоров күүстэрин холбоон, биир санаанан салайтаран Тойбохойго сүөһү эбии аһылыгын бэлэмнир дьоҕус собуоту үлэлэппиттэрэ балай да кэм ааста. Кинилэр нүөлсүтүү үлэтинэн дьарыктанан, күрүөнү-хаһааны тутан, туорахтаах култуураны сайыннаран үлэни өрө тута сылдьаллара көрөргө астык. Бииртэн-биир саҥа сүүрээни олоххо киллэрэргэ дьулуһан, оҥорон таһаарар бородууксуйаларын сөптөөхтүк көрөргө-харайарга, бурдугу түргэнник уонна хаачыстыбалаахтык куурдарга анаан уолаттар аны, аныгы, баараҕай тэриллээх ыскылааты үлэлэтэн саҕалаатылар. Киһи хаһан баҕарар, ханна да сырытттар элбэххэ үөрэнэн, баай уопуту, элбэх билиини сомсон сырыттаҕына эрэ үлэтэ таһаарыылаах буолар. Ол курдук, эдэр фермердэр баһылык Анатолий Григорьев салайааччылаах улуус дэлэгээссийэтин кытары Кытай курдук улуу дойдуга баран бурдугу куурдар аныгы тэрил баарын сөҕөн-махтайан кэлбиттэрэ. Уонна бэйэлэригэр эмиэ итинник тэрил баар буоларыгар элбэх кэпсэтиилэри ыытан, тыа хаһаайыстыбатын министиэристибэтиттэн өйөбүл ылан, федеральнай программаҕа кыттан олоххо киллэрэри ситистилэр.
«Төһө да уустук кэм тирээн турдар, өрөспүүбүлүкэбит тыатын хаһаайыстыбатын министиэристибэтэ кырдьык үлэни өрө тутар эдэр уолаттары өйөөн көмө буолар. Онон, кинилэргэ барҕа махталбытын тириэрдэбит. «Тойбохой» ТХПК өссө да сайда турарыгар бигэ эрэнэбит”, – диэн баһылык Анатолий Григорьев этэн аһарда.
“Сунтаар улууһугар «Тойбохой» ТХПК кормовой центр буолуон сөп эбит», – диэн т/х миниистирин бастакы солбуйааччыта Анна Стручкова бэлиэтээн ааста уонна эдэрдии эрчимнээх уолаттар ылсан үлэлии сылдьалларын көрөн хайҕаата.
Бары билэрбит курдук, ынах сүөһү иҥэмтиэлээх эбии аһылыгынан аһаатаҕына эрэ, уопсай туруга тупсар уонна хаачысыбалаах үрүҥ илгэ дэлэйэр. Онон, бу хамсааһын улуус тыатын хаһаайыстыбата сайдарыгар төһүү күүс буолара саарбаҕа суох. Бэйэ оҥорон таһаарар бородууксуйаны улуус олохтоохторун эрэ буолбакка, ыаллыы сытар улуустары эмиэ хааччыйар сыал-сорук турар.
Елизавета ТИТОВА