Ахсынньы 2-3 күннэригэр Тойбохойго улууспут 90-с сылларга биир бастыҥ ыччата, спортсмена Анатолий Наумов кэриэһигэр волейболга үгэс буолбут күрэхтэһии буолан ааста. Барыта аҕыс хамаанда кытынна. Сыл аайы буоларын курдук, ыаллыы Мииринэй улууһуттан 4 хамаанда (МРТК-1, МРТК-2,куорат, Арыылаах (Новай), биһиги улуустан Сунтаардааҕы колледж, Абаҕа түөлбэ, өрүс уҥуор нэһилиэктэр “Алмаас” диэн ааттаах холбоһуктаах уонна Тойбохой хамаандалара илин-кэлин түһүстүлэр. Халлааммыт төһө да тымныйдар күрэхтэһии сып-сылаас оҕо дьиэтин успуорт саалатыгар ыытылынна. Бастакы күн хамаандалар икки бөлөххө арахсан оонньоотулар. Иккис күҥҥэ бөлөхтөн иккилии бастыҥ хамаанда хаалан күүстээҕи быһаарыстылар. Ол курдук, Мииринэй, МРТК, Абаҕа, Тойбохой хамаандалара. Күүстээх хамаандалар оонньуулара сытыытык, тыҥааһыннаахтык барда. Түмүккэ Тойбохой хамаандата – III, Мииринэй – II, МРТК – I миэстэҕэ таҕыстылар. Бастыҥнарынан ааттаннылар: Мииринэй хамаандатыттан Алдар Комиссаров, Александр Казарин, МРТК хамаандатыттан Будажап Бабуев, Виктор Иванов. Тойбохой хамаандатыттан: Алексей Иванов, Ярослав Архангельскай, Дмитрий Кирьянов. Онтон да атын оонньооччуларга анал бириистэр туттарылыннылар. Күрэхтэһии бастыҥ оонньооччуларынан МРТК хамаандатыттан Владимир Назимкин ааттанан Анатолий Наумов ийэтэ Фатима Яковлевна туруорбут сүрүн бирииһин хаһаайынынан буолла.
Күрэхтэһии түмүгүнэн миэстэлэспит хамаандалар кубогынан, дипломунан, оонньооччулар мэтээлинэн, бириистэринэн наҕараадаланнылар. Күрэхтэһиигэ күүс-көмө буолбут спонсордарга – олохтоох дьаһалтаҕа баһылык С.В.Егоровка, нэһилиэкпит тэрилтэлэригэр, биирдиилээн ИП Я.Т.Корнилов., А.И.Стручкова Анатолий Наумов бары аймахтарыгар, о.д.а. күүс-көмө буолбут дьоҥҥо тэрийээччилэр, сортсменнар махталларын тиэрдэллэр.
Алексей ДАНИЛОВ,
күрэхтэһии сүрүн судьуйата.