Дьаарханнааҕы «Күндү күлүүктэр» мини-тыйаатыр Кыайыы күнүгэр анаан ураты формааттаах «Список Шиндлера» киинэҕэ олоҕуран, «Таптал сулуһа» иммерсивнэй испэктээк көрдөрдүлэр, туруорааччы режиссер — Василий Васильев. (Иммерсивный спектакль — это спектакль где, зрители становятся участниками событий: они свободно перемещаются по площадке, взаимодействуют с актерами, а грань между сценой и залом стирается.)
Көрөөччүлэр кулууп аанын аһыахтарыттан гетто карточкатын ылан гестапо сүүмэрдээһинин ааһан испэктээк артыыстара буоллулар. 6 көстүүлээх, 1,6 чаастаах оонньууга кыттыстылар.
Бары да билэрбит курдук, фашисткай Германия дьэбириэйдэри сир үрдүттэн имирэ эһэр сыаллаах этэ. Испэктээккэ сүрүн болҕомто икки таптаһар сүрэх концлааҕыр муҥун, нацистар сидьиҥ сыһыаннарын барытын тулуйан Сэбиэскэй аармыйа кэлэн босхолоон холбоһоллоругар уурулунна.
Иммерсивнэй испэктээк Сунтаарбыт улууһугар аан бастакытын туруорулунна. Көрөөччүлэр испэктээккэ кыттыспыттарын олус сэргээтилэр: «Дэлби сэргээн, астынан аҕай кэллибит дии. Атын көстүү, аһара үчүгэй», «Испэктээх аһара бэрт, киһи кутун-сүрүн баттыыр ыарахан баҕайы ис хоһоонноох эбит, хаста да ойон туран гер-комендаҥҥытын охсо сыстым», «Оҕолор олох бастаан куттанаан. Тоҕо биһиги кыттабытый диэ да диэ буолаллар», «Биһиги Дьаархаммытыгар аан бастакынан иммерсивнэй испэктээк турда. Тэҥҥэ оонньостубут. Сүрдээх үчүгэй. Үрдүк таһымннах: оформленияттан саҕалаан, уот-күүс, ырыа, оонньуу. Артыыстар таһымнара олох үрдүк. Киирээппитин кытта гестаполар кырдьаҕас-эдэр диэн араардылар. 94 саастаах Марфа Яковлевнаны «айах адаҕата» диэн гетто «Б» ыыттылар. Эдэрдэри үлэҕэ ыллылар. Анналаах, Василий биир көрүүлээхтик бэркэ режиссердаан туруорбуттар. Махтал», «Гестаполар аһара итэҕэтиилээхтик оонньоотулар. Ыарахан оруоллаахтар эбит».
Кырдьык испэктээк саҕаланыаҕыттан бүтүөр диэри көрөөччүлэри туруоран, оонньууга кыттыһыннарар кинилэр этэ.
Бастакы холонуу буолан сыыһа-халты баар. Кэлин сайдан, тупсан иһиэ. Маны таһынан бу испэктээккэ үйэлэригэр сыанаҕа үктэммэтэх саҥа артыыстар сүрэхтэннилэр.
Анна МАРКОВА, Дьаархан
Ааптар көрөөччүлэр устууларын таҥмыт видеота