Сунтаар нэһилиэгин олохтоохторо Нина, Владимир Игнатьевтар бүгүн социальнай хантараак көмөтүнэн эмп-томп атыылыыр аптекатын пуунун арыйдылар. Элбэх оҕолоох дьиэ кэргэн ийэтэ Нина фармацевт үөрэхтээх. Эмп-томп эйгэтигэр ирдэбилэ, хааччаҕа үгүс, онон ылбычча киһи ылсыбат. Ол эрэн өр сылларга иитиэхтээн илдьэ сылдьыбыт баҕа санаата олоххо киирэн үөрүүтэ үгүс.
— Аан маҥнай 2017 сыллаахха дьарыктаах буолуу киинин нөҥүө “Начинающий предприниматель” бырагыраамаҕа хапсан ИП буолан миэбэл ылбытым. Онтон оҕолонон бу былааным уһаан-кэҥээн хаалбыта. Ылсыбыт дьыалабын тиһэҕэр тириэрдэр баҕаттан быйыл социальнай хантараакка докумуон туттаран 350 тыһ. көмө ылан баҕа санаам туолла. Бу бэриллибит харчыга кассовай аппарат, фискальнай накопитель, компьютер, принтер, хас да ыскаап, кондиционер атыыластым. Маннык социальнай хантараак баара саҥа саҕалыыр дьоҥҥо олус үчүгэй көмө уонна тирэх буолар -, диэн Нина санаатын үллэстэр.
Саҥа дьоҕус аптека Абаҕа түөлбэтигэр Октябрьскай уул. 147/1 аадырыска атыылаһааччыларын күүтэр. Үлэлиир кэмэ: 9.00 ч.- 19.00 ч., субуота күн 10.00 ч.- 17.00 ч., өрөбүл күн 12.00 ч.- 16.00 ч.
Алена ИВАНОВА